Алматыда қауіпті учаскелерде жол қозғалысын бақылау күшейтілді, – деп хабарлайды Polisia.kz.
Жол-көлік оқиғаларына жүргізілген талдау нәтижелерін ескере отырып, Алматы қаласының әкімшілік полиция басқармасы жол қауіпсіздігін қамтамасыз ету бағытындағы жұмыстарды күшейтуде. Патрульдік полиция экипаждары жол-көлік оқиғалары мен құқық бұзушылықтар ең көп тіркелетін аумақтарға нысаналы түрде бөлінуде.
Атап айтқанда, бүгін Алатау ауданында жергілікті профилактикалық іс-шара жүргізілуде. Бұл аумақта патрульдік нарядтардың саны арттырылып, жылдамдық режимін сақтау, қиылыстар мен жаяу жүргіншілер өткелдерінен өту тәртібі, сондай-ақ мопед жүргізушілері мен жеке қозғалыс құралдарын пайдаланушылардың талаптарды орындауына бақылау күшейтілді.
Әкімшілік полиция басқармасының бастығы Серік Шумаевтың айтуынша, негізгі мақсат – айыппұл санын көбейту емес, жол-көлік оқиғаларының алдын алу және адам өмірін сақтау.
– Біз экипаждар санын жай ғана арттырып отырған жоқпыз, нақты қауіп жоғары аумақтарда мақсатты түрде жұмыс жүргізудеміз. Жол-көлік оқиғаларын талдау қай аудандарда және қай уақытта қауіптің жоғары екенін көрсетеді. Біздің міндетіміз – қайғылы жағдайлардың салдарын талдау емес, олардың алдын алу, – деп атап өтті Серік Шумаев.
Сондай-ақ ол жол қозғалысына қатысушылардың барлығына үндеу жасады.
– Жолдағы қауіпсіздік – баршамызға ортақ жауапкершілік. Тек жүргізушілер ғана емес, жаяу жүргіншілер, мопед жүргізушілері мен самокат пайдаланушылары да жол ережелерін қатаң сақтауы тиіс. Әрбір адам бір ғана қате шешім өзгенің денсаулығына немесе өміріне қауіп төндіруі мүмкін екенін түсінуі қажет, – деді ол.
