Жетісу облысында полиция шаруа қожалықтарының өкілдерімен кездесті, – деп хабарлайды Polisia.kz.
Үштөбе қаласында Жетісу облысы полиция департаментінің ұйымдасқан қылмысқа қарсы күрес басқармасының қызметкерлері шаруа қожалықтарының өкілдерімен жұмыс кездесуін өткізді. Іс-шара аудандық әкімдік ғимаратында өтіп, құқық бұзушылықтардың алдын алуға, сондай-ақ қолданыстағы заңнама нормаларын түсіндіруге бағытталды.
Кездесу барысында Еңбек кодексін сақтау, жалдамалы еңбекті қанауға жол бермеу мәселелеріне ерекше назар аударылды. Сонымен қатар құлдық және өзге де ауыр қылмыстар үшін қылмыстық жауапкершілік қарастырылатыны кеңінен түсіндірілді. Жеке бөлім ретінде адам құқықтарын өрескел бұзу болып саналатын қалыңдық ұрлау тақырыбы қозғалды.
Полицейлер мұндай әрекеттердің дәстүр мен әдет-ғұрыпқа қарамастан мүлде жол берілмейтінін атап өтті. Бұдан бөлек, құқық қорғау органдарының қызметкерлері ауылдық жерлерге тән өзекті мәселелерге — малды заңсыз таңбалау, мал ұрлығы және қауіпсіздік шараларын күшейту қажеттілігіне тоқталды.
Кездесуге қатысушыларға мүмкіндігінше бейнебақылау камераларын орнату және ауыл шаруашылығы жануарларын бақылау үшін GPS-навигация құралдарын пайдалану ұсынылды. Бұл мүліктің қорғалу деңгейін едәуір арттырып, қылмыстарды ашуды жеңілдетеді.
— Алдын алу — қылмыспен күрестің ең тиімді жолы. Біздің міндетіміз — құқық бұзушылықтарға тек жауап беру ғана емес, адамдарға олардың құқықтары мен міндеттерін, заңды бұзудың салдарын түсіндіру арқылы оның алдын алу, — деп атап өтті ұйымдасқан қылмысқа қарсы күрес басқармасының өкілі.
Ресми бөлім аяқталғаннан кейін полиция қызметкерлері тікелей шаруа қожалықтарына барды. Бидай өсірумен айналысатын шаруашылық және мал иелерімен бірлесіп ғимараттар мен мүліктің қауіпсіздік жағдайы тексерілді. Полицейлер осал тұстарды көрсетіп, қылмыскерлер жиі қолданатын тәсілдер туралы айтып, күзетті күшейтудің нақты жолдарын ұсынды.
