Астанада қоғамдық орындарда кальян шегуге қарсы рейдтер жүргізіліп жатыр, - деп хабарлайды Polisia.kz.
Астана қаласы полиция департаментінің қызметкерлері қоғамдық орындарда кальян шегудің алдын алуға және тыйым салынған фактілерді анықтауға бағытталған профилактикалық рейдтерді жалғастыруда. Жыл басынан бері кальян мен темекі өнімдерін заңмен тыйым салынған орындарда тұтынуға байланысты шамамен 1200 құқық бұзушылық тіркелді.
Кезекті рейд барысында полиция қызметкерлері қаладағы мекемелердің бірінде заң бұзушылықты анықтады.
Рейдтік іс-шара кезінде келушілердің бірі ғимарат ішінде кальян шеккені белгілі болды, бұл қолданыстағы заңнамаға қайшы. Аталған азаматқа қатысты Қазақстан Республикасы Әкімшілік құқық бұзушылық туралы кодексінің 441-бабының 1-бөлігі бойынша рұқсат етілмеген жерде темекі шеккені үшін әкімшілік хаттама толтырылды.
Еске саламыз, Қазақстанда дәмхана, мейрамхана, бар, клуб және басқа да қоғамдық орындарда кальян шегуге тыйым салынған. Бұл шаралар азаматтардың денсаулығын қорғауға және никотинді тұтынудың зиянын азайтуға бағытталған.
Полиция қала тұрғындарын заң талаптарын сақтауға шақырады. Сондай-ақ мекеме иелеріне мұндай заң бұзушылықтарға жол бергені үшін жауапкершілік қарастырылғаны ескертіледі.
Профилактикалық рейдтер жалғасын табады.
