Жетісу облысында полицейлер мен құтқарушылар жоғалған бақташыны іздеп тапты, – деп хабарлайды Polisia.kz.
13 ақпанға қараған түні полицияға шұғыл хабарлама түсті. Өтініш беруші бір күн бұрын мал жайылымына шығып, оралмаған 58 жастағы бақташының жоғалғанын хабарлады.
Анықталғандай, 12 ақпан таңертең ер адам атпен шамамен 500 бас ұсақ малды жаюға шыққан. Өзімен телефоны болғанымен, көп ұзамай оның қуаты таусылып, байланыс үзілген.
Сол күні түнде бақташының иті үйге оралды. Бұл оқиға туыстары мен шаруашылық иелері үшін дабыл белгісі болды. Іздестіру жұмыстарын дереу полиция қызметкерлері мен төтенше жағдайлар департаментінің құтқарушылары қолға алды.
Қатты боран мен бұрқасын жел жағдайында іздеу топтары автокөліктерді, техникаларды және түнде көру құралдарын пайдаланып, аумақты толық тексерді. Көріну нашар болғандықтан ұшқышсыз ұшу аппаратын қолдану мүмкін болмады, алайда іздеу жұмыстары тоқтамады.
Кәсіби тәсіл мен үйлесімді іс-қимыл нәтижесінде жоғалған адам табылды. Ер адам қатты әлсіреп қалған екен. Полиция қызметкерлері оған дереу көмек көрсетіп, су беріп, үйіне жеткізді. Қуанышқа орай, қазіргі уақытта бақташының өмірі мен денсаулығына қауіп жоқ, жағдайы қанағаттанарлық деп бағаланып отыр.
Үйіне аман-есен оралған ер адам полиция қызметкерлері мен ТЖД құтқарушыларына жеделдігі мен кәсібилігі, сондай-ақ бейжай қалмағандары үшін шынайы алғысын білдірді.
