Абай облысы бойынша қылмыстық-атқару жүйесінің қауіпсіздігі барынша жоғары мекемесінде 30-дан астам сотталғанға арналған психологиялық тренинг ұйымдастырылды, – деп хабарлайды Polisia.kz.
Іс-шара мекеме психологтары мен қызметкерлерінің қатысуымен өтті.
Тренинг барысында қатысушылар садху тақтасын пайдаланып, тәжірибелік жаттығулар жасады. Металл шегелері бар арнайы тақта зейінді шоғырландыруға, эмоцияларды бақылауға және ішкі тұрақтылықты дамытуға бағытталған психологиялық құрал ретінде қолданылды.
Мекеме психологы Айнель Болаттың айтуынша, мұндай тәжірибелер сотталғандарға сезімдері мен ойларын бақылауды үйренуге, күйзелісті жеңуге және өзіне деген сенімділікті арттыруға көмектеседі.
Тренингке қатысқан сотталғандардың бірі бұл тәжірибе мүмкіндіктерін қайта бағалауға және болашағы туралы ойлануға ықпал еткенін атап өтті.
Мекеме қызметкерлерінің айтуынша, мұндай психологиялық іс-шаралар сотталғандардың тұрақты мінез-құлықты арттыруға және оларды қоғамға қайта бейімдеуге көмектеседі.
