Жетісу облысында құқықтық тәртіпті сақтау мәселелері қаралды, - деп хабарлайды Polisia.kz.
Күнделікті тіршіліктің қарбаласында кейде көзге елеусіз көрінетін ұсақ әрекеттерге мән бермей жатамыз. Қоқысты арнайы жәшікке тастамау, темекі тұқылын кез келген жерге лақтыру, қоғамдық орындарда темекі шегу немесе жол қозғалысы ережелерін елемеу секілді әрекеттер көп жағдайда "болмашы нәрсе" ретінде қабылданады. Алайда дәл осындай ұсақ көрінетін қылықтар қоғамдағы тәртіп мәдениетінің деңгейін айқындайды.
Жетісу облысы полиция департаментінің жедел басқару орталығындағы бейнебақылау жүйелері күн сайын түрлі құқық бұзушылықтарды тіркеп отырады. Бұл деректердің әрқайсысы жай ғана заң бұзу фактісі емес, адамның қоғамға, қоршаған ортаға және ортақ тәртіпке деген көзқарасының көрінісі.
Құқық бұзушылықтарға "нөлдік төзімділік" қағидаты ең алдымен қауіпсіз әрі мәдениетті орта қалыптастыруды көздейді. Өйткені тәртіп өздігінен орнықпайды — ол әр азаматтың күнделікті іс-әрекеті мен жауапкершілігінен бастау алады.
Кейде елеусіз көрінетін құқық бұзушылықтардың өзі ауыр салдарға әкелуі мүмкін: бей-берекет тасталған темекі тұқылы табиғатқа зиян келтірсе, жол ережесін елемеу адам өміріне қауіп төндіреді.
Қоғамдық тәртіп – әр адамның жеке жауапкершілігінен басталады.
Сондықтан қарапайым ережелерді сақтау – тек заң талабы ғана емес, қауіпсіздік пен тазалыққа, ортақ мәдениет пен жайлылыққа қосылған үлес. Ал жауапты қоғам дәл осы қарапайым ұстанымнан қалыптасады.
