Талдықорғанда полицейлер киберқауіпсіздік бойынша дәріс өткізді, — деп хабарлайды Polisia.kz.
Цифрлық технологиялардың қарқынды дамуы дәуірінде интернет күнделікті өмірдің ажырамас бөлігіне айналды. Онлайн-сатып алу, қашықтан оқу, жеке деректерді сақтау және бизнес жүргізу — мұның барлығы бүгінде қалыпты құбылыс. Алайда, қолайлылықпен қатар қауіп-қатерлер де артып келеді. Соның ішінде ең өзекті мәселелердің бірі — киберқылмыс.
Осыған орай, цифрлық сауаттылықты арттыру және құқық бұзушылықтың алдын алу мақсатында Жетісу облысы киберполиция қызметкерлері Талдықорған қаласындағы №14 орта мектеп оқушыларымен профилактикалық кездесу өткізді. Кездесудің негізгі тақырыбы — соңғы уақытта жасөспірімдер жиі тартылып жатқан дропперлік схемалар болды.
Іс-шара барысында полиция қызметкерлері қылмыстық схемаларға тарту тәсілдерін жан-жақты түсіндіріп, нақты мысалдар келтірді. Сонымен қатар, мұндай әрекеттерге қатысудың қылмыстық жауапкершілікке әкелетінін ерекше атап өтті.
— Жетісу облысының киберполиция қызметкерлері ескертеді: интернетте “жеңіл әрі қауіпсіз табыс” деген болмайды. Оның артында ауыр қылмыс жасырынуы мүмкін. Банк деректеріңізді үшінші тұлғаларға беру арқылы сіз тек қаржыңыздан ғана емес, болашағыңыздан да айырылуыңыз мүмкін, — деп атап өтті ведомство өкілдері.
Кездесу барысында жеке цифрлық қауіпсіздік мәселелеріне де ерекше назар аударылды. Оқушыларға жеке деректерді қорғау, интернеттегі бейтаныс адамдармен сақ қарым-қатынас жасау және қаржылық мәліметтерді ешкімге бермеу қажеттігі түсіндірілді.
Жетісу облысындағы білім беру ұйымдарында мұндай профилактикалық жұмыстар алдағы уақытта да жалғасады. Негізгі мақсат — жас ұрпақтың цифрлық кеңістіктегі қауіптер мен жауапкершілікті дұрыс түсінуін қалыптастыру және оларды құқыққа қайшы әрекеттерге тартылудан қорғау.
