Жетісуда ата-аналарға балалардың қауіпсіздігі бойынша түсіндіру жұмыстары жүргізілді, - деп хабарлайды Polisia.kz.
Көксу ауданының Балпық би ауылында кәмелетке толмағандардың қауіпсіздігін арттыруға бағытталған маңызды профилактикалық іс-шара өтті. Жетісу облысы полиция департаментінің қоғамдық қауіпсіздік басқармасы қызметкерлері жергілікті әкімдік, білім бөлімі және психолог мамандарымен бірлесіп, мәдениет үйінде ата-аналар жиналысын ұйымдастырды.
Кездесудің негізгі тақырыбы – балалардың қауіпсіз мінез-құлқын қалыптастырудағы отбасының рөлі болды. Ашық диалог барысында құқық қорғау органдары ата-аналарға жасөспірімдердің күнделікті өмірде кездесетін қауіп-қатерлері туралы кеңінен түсіндірді. Әсіресе балалардың түнгі уақытта қараусыз жүруіне жол бермеу және жол-көлік оқиғаларының алдын алу мәселелеріне ерекше назар аударылды. Мамандардың айтуынша ата-аналардың тұрақты бақылауы мен белсенді қатысуы құқық бұзушылықтар мен жазатайым жағдайлардың алдын алуда шешуші рөл атқарады.
Сонымен қатар профилактикалық жұмыстың ең алдымен отбасынан басталатыны ерекше атап өтілді. Сенімді қарым-қатынас, дұрыс тәрбие және ата-ананың жеке үлгісі – баланың жауапты әрі саналы тұлға болып қалыптасуының негізгі алғышарттары екені айтылды.
– Ешбір профилактикалық рейд ата-ана бақылауын алмастыра алмайды. Баланың қауіпсіздігі – ең алдымен отбасындағы сенім мен өзара түсіністіктен басталады, – деп атап өтті қоғамдық қауіпсіздік басқармасының өкілдері.
Жиын қорытындысында ұйымдастырушылар бала қауіпсіздігі – ата-ананың күнделікті назарын, қамқорлығы мен жауапкершілігін талап ететін маңызды міндет екенін тағы бір мәрте еске салды. Тек қоғам мен отбасының өзара бірлескен іс-қимылы арқылы ғана өскелең ұрпақ үшін қауіпсіз әрі қолайлы орта қалыптастыруға болады.
