Ісіне адал тәртіп сақшысы қызметінің қыр-сырымен бөлісті, — деп хабарлайды Polisia.kz.
Полиция қатарында қызмет ететін қызметкерлердің басым бөлігі өз мамандығын жүрек қалауымен таңдаған. Әсет Батырханов – Павлодар облысы ПД ЖБО мобилизациялық даярлық жөніндегі аға инспекторы, полицияда 12 жылдан бері қызмет атқарып келеді. 2012 жылдың желтоқсанында әскери қызметке шақырылып, әскерден кейін Павлодар қаласы ІІБ жол-патрульдік полиция батальонына полицей болып жұмысқа қабылданды. Кейін Қазақстан Республикасы ІІМ-нің Ш. Қабылбаев атындағы Қостанай академиясына түсіп, оны үздік тәмамдады.
– Батальонда атқарылатын жұмыс ауқымы кең: тәулік бойы патрульдеу, құқық бұзушылықтардың алдын алу, “102” шақыруларына жедел әрекет ету, азаматтарға түрлі жағдайларда көмек көрсету, жедел жәрдем келгенге дейін алғашқы медициналық көмек көрсету, қылмыспен күрес, қылмысқа күдіктілерді ұстау, іздеуде жүрген адамдарды анықтау, сондай-ақ азаматтармен профилактикалық әңгімелер жүргізу, – дейді Әсет.
Қазіргі уақытта ол полицияның мобилизация және төтенше жағдайлар кезіндегі дайындығын қамтамасыз ететін бөлімде қызмет атқарады.
– Біздің басты міндетіміз – қызметкерлерді дағдарыс жағдайында әрекет етуге дайындау. Өйткені тиімділік олардың кәсіби даярлығына, психологиялық тұрақтылығына, қиын жағдайда шешім қабылдай алуына және басқа қызметтермен үйлесімді жұмыс істеу қабілетіне байланысты. Ұжымымызда ежелден қалыптасқан дәстүрлер бар: өзара көмек, сөз бен істің бірлігі, жас мамандарға қолдау көрсету. Біздің қағидамыз: білсең – үйрет, – дейді кейіпкеріміз.
Қызмет еткен жылдары Әсет Батырханов өз міндетін адал атқарғаны үшін бірнеше рет министрлік пен департамент тарапынан грамоталармен және алғыс хаттармен марапатталған.
Күнделікті өмірде капитан Батырханов – мейірімді жар және екі сүйкімді қыздың қамқор әкесі. Кешкісін отбасы оны асыға күтеді және жас болса да, оның қызмет кестесінің күрделі екенін түсіністікпен қабылдайды. Әсеттің айтуынша, сенімді отбасы тірегінсіз ешбір қызмет қуаныш әкелмейді.
– Мен өз уақытында дұрыс таңдау жасағаныма сенімдімін – полицей болдым. Полицей – қоғамдағы құқықтық тәртіпті қамтамасыз ететін негізгі тұлға. Осындай қызмет арқылы мен өз өмірімнің мәнін табамын. Біздің еңбегіміз – азаматтардың қауіпсіз өмірінің кепілі, – дейді Әсет.
