Семей қаласындағы №30 мектепте оқушылармен наркологиялық қылмыс, қауіпсіздік және өз шешімдері үшін жауапкершілік мәселелеріне арналған профилактикалық кездесу өтті, — деп хабарлайды Polisia.kz.
Полиция қызметкерлері жасөспірімдерге “жеңіл табыс” пен “курьерлік жұмыс” деген ұсыныстардың артында көбіне есірткінің заңсыз айналымына тарту жататынын түсіндірді. Мұндай әрекеттер ауыр қылмыстық жауапкершілікке әкеліп, жас адамның тағдырын түбегейлі өзгертуі мүмкін.
Медицина мамандары есірткі заттарын қолданудың салдары, АИТВ инфекциясын жұқтыру қаупі және өз денсаулығына саналы түрде қараудың маңыздылығы туралы айтты.
Кездесуге полиция қызметкерлері, наркологтар және ЖИТС орталығының өкілдері қатысты. Ашық диалог форматында өткен іс-шара оқушыларға өздерін толғандырған сұрақтарды қойып, нақты жауап алуға мүмкіндік берді.
Полиция кәмелетке толмағандар арасында құқықтық сауаттылықты арттыруға және есірткіге қарсы тұрақты көзқарас қалыптастыруға бағытталған жүйелі профилактикалық жұмыстарды жалғастыруда.
