Батыс Қазақстан облысында өткен "Бағдаршам" атты жас жол қозғалысы инспекторларының облыстық слеті өңірдің барлық ауданынан келген оқушыларды біріктірді, – деп хабарлайды Polisia.kz.
Батыс Қазақстан облысында 15 команда мен 91 қатысушыны біріктірген "Бағдаршам" атты жас жол қозғалысы инспекторларының облыстық слеті өтті. Іс-шараға өңірдің барлық ауданынан келген командалар қатысып, бұл оқушылар арасында жас жол қозғалысы инспекторлары қозғалысын дамытуға және жол қауіпсіздігі мәселелеріне деген жоғары қызығушылықты көрсетті.
Слет "Заң мен тәртіп" қағидатын жүзеге асыру аясында ұйымдастырылып, жас ұрпақтың құқықтық мәдениетін, тәртібін және жауапкершілігін қалыптастыруға бағытталды.
Үш күн бойы қатысушылар жол қозғалысы ережелері бойынша білімдерін, жолда қауіпсіз жүріс-тұрыс дағдыларын, алғашқы медициналық көмек көрсету қабілеттерін көрсетті. Сонымен қатар олар велосипедті мәнерлеп жүргізу, жол қозғалысын реттеу және зияткерлік сайыстар бойынша жарысты.
Іс-шара барысында заңға құрметпен қарауды тәрбиелеуге, азаматтық жауапкершілікті қалыптастыруға және жол қозғалысы ережелерін сақтаудың қоғамдық қауіпсіздіктің ажырамас бөлігі екенін түсіндіруге ерекше назар аударылды.
Жарыс қорытындысы бойынша жүлделі орындар келесідей бөлінді:
1-орын — "Бауыржан ұландары" командасы (Бәйтерек ауданы)
2-орын — "Жас сақшы" командасы (Жәнібек ауданы)
3-орын — "Жігер" командасы (Ақжайық ауданы)
Аталған команда 12–21 тамыз аралығында Қостанай облысында өтетін Ғазиз Байтасов атындағы XXI республикалық жас жол қозғалысы инспекторлары слетінде өңір намысын қорғайды.
Слет қорытындысы бойынша қатысушылар "Жас санитар", "Жас реттеуші", "Жол қозғалысы ережелерінің білгірлері", "Велосипедті мәнерлеп жүргізу" және "Үздік үгіт-насихат бригадасы" номинациялары бойынша марапатталды.
Республикалық кезеңге Қазақстанның өңірлік жарыстарының жеңімпаздары, сондай-ақ Әзербайжан, Беларусь, Қырғызстан, Тәжікстан, Түрікменстан, Өзбекстан және Ресей елдерінің командалары қатысады.
Мұндай іс-шараларды өткізу "Заң мен тәртіп" қағидаттарын нығайтуға, оқушылардың қауіпсіз жүріс-тұрыс дағдыларын қалыптастыруға және жастардың құқықтық санасын арттыруға ықпал етеді.
