Алматыда велосипед ұрлығына қарсы профилактикалық іс-шара өтуде, - деп хабарлайды Polsia.kz.
Алматы қаласында велосипед ұрлығының алдын алуға бағытталған жедел-профилактикалық іс-шара жүргізілуде. Күннің жылынуына байланысты мұндай қылмыс түрлері дәстүрлі түрде көбейе түседі.
Криминалдық полиция қызметкерлері велосипед ұрлығына қатысты деректерге талдау жасап, нақты ұрлық сәттері бейнеленген арнайы бейнематериал әзірледі. Тәжірибе көрсеткендей, көп жағдайда қылмыстың орын алуына мүлік иелерінің немқұрайлылығы себеп болады.
Велосипедтер көбіне көпқабатты тұрғын үйлердің кіреберістерінде, аулаларда, дүкен маңында және өзге де ашық орындарда қараусыз қалдырылады. Сонымен қатар азаматтар қарапайым қауіпсіздік шараларын жиі ескере бермейді: ұрлыққа қарсы құрылғыларды пайдаланбайды және жеке мүлкінің сақталуына жеткілікті деңгейде мән бермейді.
Алматы қаласының полициясы тұрғындарды жеке қауіпсіздікке жауапкершілікпен қарауға және қылмыс жасауға қолайлы жағдай туғызбауға шақырады. Велосипедті қысқа уақытқа болса да қараусыз қалдыру оның қолды болуына себеп болуы мүмкін.-
- Талдау нәтижесі көрсеткендей, велосипед ұрлығының басым бөлігі иелерінің бейқамдығынан болады. Көлік құралдары ешқандай қорғаныссыз, еркін қолжетімді жерде қалдырылады. Мұны қаскөйлер өз пайдасына пайдаланады. Азаматтарды мүлкін қараусыз қалдырмауға, әсіресе түнгі уақытта қауіпсіз жерге қоюға және мүмкіндігінше тұрғын үйдің ішіне кіргізуге шақырамыз, – деді Алматы қаласы ПД криминалдық полиция басқармасының бастығы Асхат Дәулетияров.
Сонымен қатар полиция өкілдері ұрлық жасағаны үшін қылмыстық жауапкершілік қарастырылғанын еске салды. Қазақстан Республикасының Қылмыстық кодексіне сәйкес, ұрлықты бірнеше рет жасау, келтірілген шығын көлемі аз болған күннің өзінде, ауыр қылмыс санатына жатқызылып, 3 жылдан 7 жылға дейін бас бостандығынан айыру жазасы көзделген.
