Аптап ыстықта судағы қауіпсіздік талаптарын сақтау ерекше маңызды. Осы орайда тәртіп сақшылары демалыс орындары мен шомылуға тыйым салынған учаскелерде рейдтік тексерулер мен түсіндіру жұмыстарын үздіксіз жалғастыруда, – деп хабарлайды Polisia.kz.
Полиция ата-аналарды балаларды су жағасында қараусыз қалдырмауға және оларды үнемі бақылауда ұстауға шақырады. Өйткені балалардың қауіпсіздігі – басты назарда.
Жазатайым оқиғалардың алдын алу үшін мына ережелерді қатаң сақтау қажет:
- тек арнайы жабдықталған және шомылуға рұқсат етілген орындарда ғана суға түсу;
- түбі мен тереңдігі беймәлім табиғи су айдындарына шомылмау;
- шомылуға тыйым салынған немесе ескерту белгілері орнатылған аумақтарға бармау;
- алкогольдік ішімдік ішкен күйде суға түспеу;
- балаларды су жағасында қараусыз қалдырмай, оларды үнемі ересектердің бақылауында ұстау;
- өз жүзу мүмкіндігіңізге сенімді болмасаңыз, жағалаудан алысқа жүзбеу;
- дауылды немесе қолайсыз ауа райында суға түспеу;
- күн астында ұзақ болғаннан кейін бірден суық суға секірмеу және сүңгімеу. Себебі дене температурасының күрт өзгеруі бұлшықеттердің құрысуына және сіңірдің тартылып қалуына әкелуі мүмкін;
- төтенше жағдай туындаған кезде дереу құтқару қызметтеріне немесе 102 арнасына хабарласу.
Есте сақтаңыз: қарапайым қауіпсіздік талаптарын сақтау қайғылы жағдайлардың алдын алып, адам өмірін сақтап қалуға мүмкіндік береді.
