Қарағандыда Кеншілер күніне арналған ауқымды мерекелік шара өтті. Ашық аспан астындағы концертке әлемге танымал өнер жұлдыздары қатысып, мерекені тамашалауға 250 мыңға жуық адам жиналды. Осындай көпшілік қатысқан іс-шарада қоғамдық тәртіп пен азаматтардың қауіпсіздігін қамтамасыз ету мақсатында құқық қорғау және жедел қызметтердің жұмысы күшейтілді, — деп хабарлайды Polisia.kz.
Мерекелік концертке Қарағанды облысының тұрғындарымен қатар, Қазақстанның өзге өңірлерінен, сондай-ақ жақын және алыс шетелдерден қонақтар қатысты.
Іс-шараның ауқымы мен көрермендер саны, сондай-ақ концерттік бағдарламаның мазмұны қауіпсіздікті қамтамасыз етуге ерекше дайындықты талап етті. Мереке бойы арнайы бөлінген аумақта және оған іргелес учаскелерде полиция қызметкерлері, Ұлттық ұланның әскери қызметшілері, құтқарушылар мен медицина мамандары қызмет атқарды.
Қазақстанда алғаш рет осындай ауқымды бұқаралық іс-шара кезінде мерекелік алаңды төрт секторға бөлу жүйесі қолданылды.
Әр сектор полиция қызметкерлерінің тұрақты бақылауында болды. Секторлар арасында арнайы дәліздер қарастырылып, олар жедел жәрдем, құтқару және басқа да шұғыл қызмет көліктерінің кедергісіз қозғалысын қамтамасыз етті. Қажет болған жағдайда бұл дәліздер азаматтарды жедел эвакуациялау үшін де пайдаланылуы мүмкін болды.
Мұндай тәсіл адам көп жиналған аумақтағы жағдайды тиімді бақылауға, жекелеген учаскелерде халықтың шамадан тыс шоғырлануына жол бермеуге және жағдай өзгерген кезде жедел әрекет етуге мүмкіндік берді.
Іс-шара аумағында барлық қызметтің жұмысын үйлестіру үшін жедел штаб құрылды. Оның құрамына полиция және өзге де мемлекеттік органдардың өкілдері кірді. Туындаған мәселелер сол жерде, нақты уақыт режимінде шешіліп отырды.
Қауіпсіздік шараларын күшейту мақсатында мерекелік алаңға әуеден бақылау жүргізілді. Төрт ұшқышсыз ұшу аппараты концерт өтіп жатқан аумақ пен оған іргелес учаскелерді үздіксіз бақылауда ұстады.
Дрондар арқылы ықтимал қауіпті жағдайлар дер кезінде анықталды. Атап айтқанда, жақын маңдағы тұрғын үйлердің шатырына көтерілген төрт адам анықталды.
Полиция қызметкерлері олардың орналасқан жерін жедел анықтап, азаматтарды шатырдан қауіпсіз түсірді. Осылайша, жазатайым оқиғалардың алдын алды.
Адам көп жиналған жерде балалардың ата-анасынан адасып қалу қаупі де жоғары. Осыған байланысты полиция қызметкерлері балалардың қауіпсіздігіне ерекше назар аударды.
Балаларды жедел іздеу, қауіпсіз жерге орналастыру және ата-аналарымен қайта қауыштыру үшін алдын ала үш арнайы автобус бөлінді. Олар уақытша жинау пункттері ретінде пайдаланылды.
— Іс-шара барысында көп мыңдық халықтың арасынан 185 бала ата-анасынан адасып қалды. Олардың барлығы арнайы ұйымдастырылған орынға жеткізілді. Жеке басы анықталғаннан кейін балалар ата-аналарына тапсырылды. Осылайша барлық бала жақындарымен қайта қауышты, — деді Қарағанды облысы полиция департаменті бастығының орынбасары Жасқайрат Каиров.
Полиция жұмысының маңызды бағыттарының бірі — жол қозғалысы қауіпсіздігін қамтамасыз ету.
Мерекелік алаңға жақын көшелерде көлік ағынының күрт артуына байланысты жолдағы жағдайды бақылау күшейтілді. Полиция қызметкерлері көлік қозғалысын реттеп, көлік ағындарын бақылауда ұстады, жүргізушілердің жол қозғалысы ережелерін сақтауын қадағалады.
Сонымен қатар көлік кептелістерінің алдын алуға және жедел жәрдем, құтқару қызметтері мен басқа да шұғыл қызмет көліктерінің кедергісіз өтуіне ерекше мән берілді.
Полиция қызметкерлерінің үйлесімді жұмысының арқасында мерекелік алаңға қауіпсіз қатынау ұйымдастырылып, концерт аяқталғаннан кейін мыңдаған автокөліктің аумақтан ретпен шығуына жағдай жасалды.
Қатысушылар санының көптігіне қарамастан, іс-шара барысында қоғамдық тәртіп пен қауіпсіздік тұрақты бақылауда болды.
Полиция қызметкерлері, Ұлттық ұланның әскери қызметшілері, құтқарушылар мен медицина мамандары мерекелік бағдарлама толық аяқталып, соңғы көрермен үйлеріне қайтқанға дейін қызмет атқарды.
Қарағанды облысының полиция департаментінде атап өткендей, мұндай ауқымды іс-шараның қауіпсіздігін қамтамасыз ету тыңғылықты дайындықты, күштер мен құралдарды дұрыс бөлуді, заманауи технологияларды пайдалануды және барлық қызметтердің үйлесімді жұмысын талап етті.
250 мың адам, ауқымды концерттік бағдарлама, қауіпсіздіктің төрт секторы, дрондар арқылы әуеден бақылау, жол қозғалысына күшейтілген бақылау және тәулік бойы қызмет атқарған жедел қызметтер.
Мереке бойы Қарағанды тұрғындары мен қонақтарының қауіпсіздігі басты назарда болды.
Полиция бұқаралық іс-шара барысында қоғамдық тәртіпті сақтап, қауіпсіздік талаптарын орындаған және жауапкершілік танытқан қала тұрғындары мен қонақтарына алғыс білдіреді.
