«BMW» жүргізушісі әлеуметтік желілер арқылы Түркістан облысының полицейіне көмек көрсеткені үшін алғысын білдірді, – деп хабарлайды Polisia.kz.
Ер адамның айтуынша, кешкі сағат 20:50 шамасында Жетісай ауданының тас жолы бойында көлігі бұзылып, жүрмей қалады. Осы кезде оның жанына полиция қызметкері тоқтап, не болғанын және қандай көмек қажет екенін сұрайды. Осылайша полиция қызметкері сүйреу арқанымен тұрғынның бұзылған көлігін 30 шақырым қашықтықта орналасқан жөндеу орнына, яғни Жетісай қаласына баруына көмектесті.
Полиция қызметкерінің көрсеткен көмегіне алғыс айтқысы келген автокөлік иесі оның атын сұрайды. Алайда тәртіп сақшысы «Бұл біздің міндетіміз» деп жауап беріп, өз жолымен кеткен.
Өз кезегінде «BMW» жүргізушісі Түркістан облысының барлық полицейлеріне шын жүректен алғысын білдіріп, осындай қызметкерлердің полиция қатарында көп болуын тіледі.
Айта кетсек, тәртіп сақшылары әрдайым көмекке келуге дайын. Ал, аталмыш жүргізушіге қиын жағдайда көмек көрсеткен қарапайым полиция қызметкері 15 жыл бойы Ішкі істер органдарының қатарында қызмет етіп келе жатқан Жетісай АПБ Жергілікті полиция қызметінің учаскелік полиция инспекторы Берік Батырбеков болып шықты.
