Қызметтік үй мен учаскелік пункт бір ғимаратта – СҚО-да учаскелік полиция инспекторы жұмысының жаңа форматын қолдануда, – деп хабарлайды Polisia.kz.
Солтүстік Қазақстан облысында қызметтік үймен біріктірілген жаңа учаскелік полиция пунктінің салтанатты ашылуы өтті. Облыстық полицияның тарихында алғаш рет – ауылдық учаскелік полиция инспекторының тұрғылықты үйі учаскемен бір ғимаратта орналасты.
Мамлют ауданының Новомихайловка ауылында учаскелік инспектордың тұруына және жұмыс істеуіне арналған ғимараттың құрылысы мемлекеттік-жеке серіктестік аясында, өткен жылдың желтоқсан айында басталды. Жалпы аумағы 100 шаршы метрден астам. Учаскеге іргелес аумақ абаттандырылған, ауласы бар.
– Президент өз Жолдауында «Жұртқа жақын полиция» қағидаты бойынша жұмыс істеу міндетін қойды. Мұнда учаскелік полиция инспекторының рөлі ерекше. Полиция қызметкерлерінің осындай жұмыс тәсілі барынша нәтижелі жұмыс істеуге, адамдардың шағым-арыздарына жылдам әрекет етуге ықпал етеді. Бұл учаскелік полиция инспекторының қолжетімді әрі халыққа жақсы таныс болуына мүмкіндік береді. Халықпен жаңа форматта жұмыс істеу облыстың басқа аудандарында да жалғасатын болады, – деп атап кетті СҚО ПД бастығы Марат Төлебаев.
Ғимаратты салтанатты түрде ашу рәсіміне облыс әкімінің орынбасары Ғани Нығыметов қатысты. Ол ауылдық учаскелік полиция инспекторларының жаңа жұмыс форматымен танысты. Полицияның тірек пунктіне жергілікті мектепте және Новомихайловка ауылында орнатылған бейне бақылау камералары қосылған. Новомихайловка ауылдық округінің учаскелік полиция инспекторы Олжас Шаяхметовтің айтуынша, оның әкімшілік учаскесінде алты елді мекен бар, онда екі мыңнан астам адам тұрады. Жұмысының жеделдігіне, сондай-ақ ашықтық пен мобильділігіне басқа да заманауи ресурстар әсер етеді. Полицей бейнежетон, планшетпен қамтамасыз етілген. Сондай-ақ, жас учаскелік инспекторге жаңа «Chevrolet Cobalt» қызметтік автокөлігі табыс етілді.
Салтанатты іс-шара соңында облыстық полиция ведомствосының басшысы құқықтық тәртіпті қамтамасыз еткені үшін аудан басшылығына және жұртшылыққа алғысын білдірді.
