Астанада полиция қызметкерлері болаттан жасалған шаршы құбырларды ұрлады деген күдікпен 35 жастағы қала тұрғынын анықтады, — деп хабарлайды Polisia.kz.
Алдын ала мәлімет бойынша, ер адам жұмыс нысандарының бірінде бола тұра, ұзындығы үш метрден асатын 40-тан астам болат шаршы құбырды жасырын түрде ұрлаған. Ұрланған мүлікті тасымалдау үшін жалға алынған ГАЗель жүк көлігін пайдаланған. Келтірілген материалдық шығын 200 мың теңгеден асты.
Жедел-іздестіру іс-шаралары барысында, соның ішінде бейнебақылау камераларындағы жазбаларды зерделеу нәтижесінде, полиция қызметкерлері күдіктінің жеке басын анықтап, оны ұстады. Аталған факті бойынша қылмыстық іс қозғалды.
Полиция бөтеннің мүлкін ұрлағаны үшін қылмыстық жауапкершілік көзделгенін еске салады.
Азаматтарды заң талаптарын сақтауға, өзгенің меншігіне құрметпен қарауға және құқық бұзушылық фактілері туралы полицияға хабарлауға шақырамыз.
