Атырауда қоғамдық көлікті мас күйінде басқарып қарсы бағытқа шыққан екі жүргізуші анықталды, – деп хабарлайды Polisia.kz.
– Облыс аумағында автомобиль жолдарында жолаушыларды тасымалдауды жүзеге асыратын жүргізушілер арасында көліктік тәртіпті арттыру, сондай-ақ желіде жолаушылар тасымалы қызметін тіркеусіз жүзеге асыратын азаматтарға қатысты бақылауды жетілдіру мақсатында 4-13 қазан күні аралығында республикалық денгейде «Автобус» жедел-профилактикалық іс-шарасы өтуде. Аталған іс-шараның бірінші күні ПД
патрульдік полиция қызметкерлері жолаушылар тасымалымен айналысатын көлік құралын алкогольдік ішімдік ішкен күйінде басқарған екі деректі анықтады, – деді Атырау облысы Полиция департаментінің бастығы Қамза Үмбетқалиев.
Мысалы патрульдік полиция қызметкерлері 4 қазан күні таңғы сағат 07:40 шамасында Ақтобе-Атырау-Астрахань тас жолының бойында қоғамдық көлікті тоқтатып, тексеру кезінде, 1979 жылы туған жүргізушіден ішімдіктің иісін байқаған.
Осыған ұқсас жағдай таңғы сағат 08:52 шамасында орын алған. Қоғамдық көліктің 46 жастағы жүргізушісі Астрахань тас жолының 577 шақырым тұсында автобус көлігін
алкогольдік ішімдік ішкен күйінде басқарған.
Екі жүргізушіге қатысты ҚР ӘҚБтК-нің 608 бабымен әкімшілік хаттамалар толтырылды. Сонымен қатар екі автобус көлігінің жүргізушілері де жолдың қарсы бағытына шығып, көлік құралын рұқсатсыз жабдықтағаны үшін ҚР ӘҚБтК-нің 596 бабы 3 тармағы және ҚР ӘҚБтК-нің 590-бабы 7-тармағы бойынша әкімшілік хаттамалар жасақталды.
Бұл бағыттағы жұмыстар жалғасуда.
