Сырдария ауданында екі ағайынды әкелерінің жолын қуып, полицей атанған, – деп хабарлайды Polisia.kz.
Сырдария ауданы Тереңөзек кентінде тұратын отставкадағы полиция подполковнигі Серік Бексейітовты ауданда көпшілігі жақсы біледі. Серік Бексейітов Ішкі істер органдарында 30 жылдан астам қызмет атқарған. Қазіргі таңда ІІО-ның құрметті зейнеткері екі ұл, үш қыз тәрбиелеп өсіруде.
Серік Бексейітов екі жоғары білім иесі. Қызылорда педагогикалық институтын және Қарағанды қаласындағы жоғары милиция мектебін бітірген. Еңбек жолын Тереңөзек аудандық атқару комитетінің нұсқаушысы болып бастап, 1984 жылдан 2004 жылға дейін құқық қорғау саласында абыройлы қызмет жасады. Теренөзек аудандық ішкі істер бөлімінде түрлі лауазымда жұмыс жасап, аудандық ішкі істер бөлімі бастығының орынбасары дәрежесіне дейін жетті. Одан кейін Қызылорда облыстық Ішкі істер басқармасында қызмет атқарып, 2004 жылы зейнет демалысына шықты.
Әкесінің жолын қуған үлкен ұлы полиция майоры Алтынбек Бексейітов бүгінгі күнде Сырдария ауданының полиция бөлімінің кадр саясаты тобының инспекторы лауазымында қызмет атқарып келеді. Алтынбек Бексейітов Қорқыт-Ата атындағы Қызылорда мемлекеттік университетінің заң факультетін бітірген. 2004 жылы Сырдария аудандық ішкі істер бөліміне жұмысқа қабылданып, қазіргі таңда осы бөлімде абыроймен қызмет атқаруда.
Кіші ұлы Асылбек Бексейітов 2010 жылы Сырдария ауданы Теренөзек кентіндегі №35 И.Тоқтыбаев атындағы қазақ орта мектебін бітіріп, сол жылы Қазақстан Республикасы Ішкі істер министрлігінің Алматы Академиясының жоғары оқу орнына түсіп, оны 2014 жылы бітіреді. Сонан соң Қызылорда қаласының Ішкі істер басқармасында үш жыл тергеуші болып қызмет атқарды. 2017 жылы Қазақстан Республикасы Ішкі істер министрлігінің Алматы академиясының магистратурасына күндізгі бөліміне түсіп, оны 2019 жылы үздік бітіріп, Қызылорда қалалық Полиция басқармасына аға тергеуші болып қызмет атқарады. 2020 жылдан бастап Қызылорда облысы Полиция департаментінің тергеу басқармасының аға тергеушісі лауазымынында қызмет жасауда.
Бүгінгі күні Бексейітовтердің екі ұлы әке жолын қуса, үш қызы анасы Роза Досмағамбетованың ізін жалғап, мұғалімдік қызмет атқаруда.
