Нұр-Сұлтандық тұрғын ұландықтарға алғысын білдірді, – деп хабарлайды Polisia.kz.
27 мамыр күні сағат 21.00-де «Сарыарқа» ауданында қоғамдық тәртіп пен қауіпсіздікті қамтамасыз ету бойынша қызметке түскен Ұлттық ұлан 5573 әскери бөлімінің жауынгерлері жоғалған IPhone 11 телефонын тауып, иесіне қайтарды.
Әскери жасақ бастығы қатардағы Наурызбек Бақыт патрульшілер қатардағы Арсен Әбілханұлы мен Артем Музыченкомен бірге көше бойын патрульдеп келе жатқанда жерден ұялы телефонды көріп, бірден иесін іздей бастаған.
Біраз уақыт өте телефон иесі өзі хабарласқан. Жоғалған гаджетін қайтарған азамат ұландықтарға алғысын білдірді.
