ІІМ Алматы академиясында Алғыс айту күні аталып өтті, – деп хабарлайды Polisia.kz.
Алғыс айту күнін ІІМ Алматы академиясының жеке құрамы мен тыңдаушылары да салтанатты түрде атап өтті.
2016 жылдан бастап аталып келе жатқан Алғыс айту күні егеменді еліміздің жарқын болашағы үшін аянбай тер төккен барлық қазақстандықтардың бір-біріне деген құрметін арттыратын күн.
Мереке күні идеологиялық және имидждік жұмыс орталығының бастығы А. Алдабергенов пен идеологиялық және имидждік жұмыс бөлімінің бастығы Е. Жақиянов бастапқы кәсіби-даярлық курсының тыңдаушыларына тақырыптық дәріс өткізіп, жас ұрпақтың бойында Отанға деген патриоттық сезімді арттырудың маңыздылығы туралы әңгімеледі.
Салтанатты шара концерттік бағдарламаға ұласып, жиналғандар бастапқы кәсіби-даярлық курсының тыңдаушысы А. Өмірбековтің төгілдіре тартқан күйлеріне дән риза болды.
Алғыс айту күні тыңдаушылар академияның мұражайын аралап, ондағы Мақан Есболатовқа және Шырақбек Қабылбаевқа арналған бұрышпен танысты. Сондай-ақ, Алматы академиясын басқарған және осы академияда оқыған генералдардың еңбектегі жетістіктеріне қанығып, мереке соңында естелік суретке түсті.
