Павлодар облысында өткен демалыс күндері екі жол-көлік оқиғасы болды. Адам шығыны бар, – деп хабарлайды Polisia.kz.
10 қыркүйек сағат 22-00-де Қызылтаң ауылының жанындағы “Омбы-Майқапшағай” автожолының 338 шақырымында Toyota Sequoia автокөлігінің 33 жастағы жүргізушісі рөлді басқара алмай, кюветке аударылып кеткен. ЖКО салдарынан 38 жастағы жолаушы жарақатымен ауруханаға жеткізілді.
Екінші жол-көлік оқиғасы 11 қыркүйек сағат 00.10-да “Ленин-Курчатов” автожолының 101 шақырымында Кеңтүбек ауылының маңында болды. Онда ВАЗ-21099 және ВАЗ-2106 автокөліктері соқтығысып қалды.
Жол-көлік оқиғасы салдарынан ВАЗ-2106 автокөлігінің 54 жастағы жолаушысы оқиға орнында көз жұмды. 30 жастағы жүргізуші мен 29 жастағы жолаушы, сондай-ақ ВАЗ-21099 автокөлігінің 48 жастағы жүргізушісі жарақат алып, ауруханаға жеткізілді.
Аталған фактілер бойынша сараптама тағайындалды. Тексеру жүргізіліп жатыр. Автокөліктер айыппұл тұрағына қойылды.
