Ақсу қаласының жас полицейлері қалалық музейге барды, - деп хабарлайды Polisia.kz.
Ел тарихын зерделеу, тарихи мұра мен ұлттық құндылықтарға құрмет қалыптастыру, сондай-ақ Отанға қызмет ету дәстүрлерін дәріптеу мақсатында Ақсу қаласы полиция бөлімінің жас қызметкерлеріне қалалық музейге экскурсия ұйымдастырылды.
Экскурсия барысында жас полицейлер туған өлкенің тарихымен танысып, өңірдің қалыптасуы мен дамуына қатысты маңызды тарихи оқиғалар және оның өркендеуіне үлес қосқан тұлғалар туралы мағлұмат алды. Музей экспозициялары қазақ халқының мәдени мұрасын, салт-дәстүрлері мен рухани құндылықтарын тереңірек тануға мүмкіндік берді.
– Экскурсия барысында тарихи жадтың патриотизмді, азаматтық жауапкершілікті және аға буынға құрмет сезімін қалыптастырудағы маңызына ерекше назар аударылды. Мұндай іс-шаралар жас қызметкерлерге ұлттық дәстүрлерді сақтау мен ұрпақтар сабақтастығын жалғастырудың маңызын түсінуге көмектеседі, – деді Ақсу қаласы полиция бөлімінің бастығының орынбасары Максим Кустанов.
Ішкі істер органдарының қызметкерлері үшін ел тарихын білу мен тарихи мұраға құрметпен қарау маңызды. Өйткені Отанға қызмет ету – қызметтік міндеттерді адал орындаумен ғана шектелмейді. Ол антқа беріктікті, қоғам алдындағы жауапкершілікті, заңға құрметті және азаматтардың құқықтары мен қауіпсіздігін қорғауға әрдайым дайын болуды білдіреді.
Мұндай танымдық іс-шаралар жас қызметкерлердің ой-өрісін кеңейтіп, патриоттық рухын нығайтуға және таңдаған мамандығына деген жауапкершілігін арттыруға ықпал етеді.
Тарихқа құрмет, ұлттық құндылықтарға адалдық және қызметке беріктік – Отанға лайықты қызмет етудің маңызды негіздері.
