Павлодар облысында жыл басынан бері тыныштықты бұзғаны үшін 2700-ге жуық адам әкімшілік жауапкершілікке тартылды, – деп хабарлайды Polisia.kz.
Мысалы, 10 шілдеде сағат 23:50-де полицияға Малайсары көшесіндегі көпқабатты үйдің тұрғынынан пәтерде қабырғаның келесі жағында шу шығып жатқаны туралы қоңырау түсті. Сол түні Ломов көшесіндегі тағы бір көпқабатты үйдің тұрғыны полицияға хабарласып, таңғы сағат 04-те жанжал шығаруы мүмкін жас жұбайларға шағымданды.
Тыныштықты бұзушыларға қатысты полицейлер ҚР ӘҚБтК-нің 437-бабы бойынша әкімшілік іс қозғады.
Сондай-ақ барлық отбасы мүшелерімен тыныштықты сақтау қажеттілігі туралы профилактикалық әңгіме жүргізілді. Полицейлер егер сіздің түнгі демалысыңыз бен тыныштығыңызға көршілер кедергі келтірсе немесе үйде қандай да бір шулы жұмыстарды жүргізсе, құқық бұзушыларды ҚР ӘҚБтК-нің 437-бабы бойынша жауапкершілікке тартуға болатыны туралы еске салады.
Мұндай құқық бұзушылық шулы көршілерге ескерту немесе айыппұл салу қаупін тудырады. Полицияның басты кеңесі:
Көршілеріңізбен бейбіт өмір сүруге және басқалардың тыныштығын құрметтеуге тырысыңыз. Әрқашан заңмен белгіленген уақытты есте сақтаңыз: сіз жұмыс күндері сағат 22.00-ден 09:00 аралығында, ал демалыс күндері 23:00-ден 10:00 аралығында тыныштықты сақтауыңыз керек.
