Павлодар тұрғыны жоғалған 16 жылқысын тауып берген полицейге алғыс айтты, – деп хабарлайды Polisia.kz.
Май ауданының полиция бөлімі басшылығының атына Павлодар қаласының тұрғыны Смағұлов Саматтан алғыс хат келіп түсті. Қала тұрғыны учаскелік полиция инспекторы Жанболат Достаевқа қызметтегі кәсібилігі үшін алғыс білдірді.
– 17 сәуірде маған тиесілі 16 жылқы жайылымнан жоғылып кетті. Дәл сол күні ауа райы өзгеріп, боран басталған. Алдымен біз іздеуді өзіміз жүргіздік, бірақ бәрі нәтижесіз болды. Үш күндік іздеуден кейін мен Ақшиман ауылының учаскелік полиция инспекторына хабарласып, жылқылардың жоғалғаны туралы хабарладым. Біраз уақыттан кейін Жанболат Достаев қоңырау шалып, менің жылқыларымды тапқанын хабарлады. Кәсіби шеберлігі мен азаматтарға деген жанашырлығы үшін алғысымды білдіргім келеді, – деп жазады Самат Смағұлов хатында.
Учаскелік инспектор жоғалған жылқыларды іздеуге шығып, жақын маңдағы шаруа қожалықтары мен жайылымдарды, дала алқаптарын аралай бастады. Жұмыс барысында Ақшиман округінің дала аймағында, Кентубек ауылының жайылымынан 90 км жерде иесіз жайылып жүрген жылқылар табынын байқаған. Жақындай келе, жоғалған жылқыларға ұқсас 16 жылқыны көрді. олжа жайлы жылқы иесіне хабарлап, олар келген соң иесіне тапсырды.
