Петропавлда автокөлігімен жүйткіген жүргізуші ағашқа соғылды, – деп хабарлайды Polisia.kz.
Петропавлда көлік жүргізушісі ағашты сындырды. Апат мамырдың төртінен бесіне қараған түні орын алған. Жамбыл-Чайковский көшелерінің қиылысында «Renault» көлігін басқарған 34 жастағы қала тұрғыны рөлге ие бола алмай қалған. Көлік ағашқа соғылып, сынған ағаш жол үстіне құлаған. Жүргізуші медициналық мекемеге жеткізіліп, медициналық көмек көрсетілгеннен кейін үйіне жіберілді. Тексеріс кезінде ер адамда көлікті басқару құқығы болмай шыққан. Сондай-ақ, ол медициналық куәландырудан өтуден бас тартқан. Алайда, бұл әрекеті жақсылыққа апарған жоқ, себебі медициналық куәландырудан бас тарту құқық бұзушылық болып табылады.
– ҚР Әкімшілік құқық бұзушылық туралы Кодексінің 613-бабы 9-бөлігі – медициналық куәландырудан өтуден бас тартқаны, көлік құралын басқаруға құқығы жоқ болғаны үшін және аталған Кодекстің 610-бабының 3-бөлігі – жол-көлік оқиғасын жасағаны үшін қала тұрғынына қатысты екі хаттама толтырылды. Материалдар процессуалдық шешім қабылдау үшін Петропавл қаласының Мамандандырылған әкімшілік сотына жіберілді. Сот қаулысымен жүргізушіге 25 тәулік түріндегі әкімшілік қамау және 60 айлық есептік көрсеткіш көлеміндегі айыппұл белгіленді. Автокөлік арнайы тұраққа қойылды, – деді Петропавл қ. ПБ патрульдік полиция батальоны штабының бастығы Оксана Попова.
