Қызылорда облысындағы ҚАЖД-дағы кинолог тінтіуші иттерді дайындаудың сырымен бөлісті, – деп хабарлайды Polisia.kz.
Қызылорда облысы ҚАЖД №60 мекемесінің режим бөлімінде есірткі заттарын анықтау үшін қызметтік иттерді пайдалана отырып, тінту жүргізеді. Ерекше қызмет атқаратын бұл төрт аяқты жануар ерекше күтімді қажет ететіндіктен мезгіл сайын тамақтану мен уақытылы ем алуы қолға алынған.
Иттердің көмегімен жарылғыш зат, есірткі, қару ізделеді. Яғни, кинолог пен ит бірлесе жұмыс істейді.
– Қазіргі таңда мен 7 жастағы Мартин есімді көмекшіммен бірге жоспарға сай жаттығу алаңындамыз. Ерекше қасиетке ие көмекшім екеуміз аз уақытта тіл табысып, тыйым салынған заттардың мекеменің ішкі аумағына енуінің алдын аламыз Итті жақсы көрмесе, жан-дүниесі мен табиғатын түсінбесе, олармен жұмыс істеу қиын. Күшік кезінде олардың мінезін әбден зерттеп алу қажет. Тінтуші жануарды осы мамандыққа үйрету – жас баланы тәрбиелеумен бірдей. Оны да алдайсың, еркелетесің, тіпті ұрысып аласың. Күшік кезінде ештеңе білмейді, жаттығулар кезінде олардың ерекше қасиеттері ашылады. Итті күтіп-баптау, тамағын беру де біздің міндетіміз. Жануар қамқорлықты қажет етеді. Оны үсініп, қамқор болсаң, жақсылығыңды ұмытпайды, еселеп қайтарады. Олардың адамдарға деген адалдығы мен сенімділігінде шек жоқ, – дейді режим бөлімінің бақылаушы кинологы Бекзат Аманғалиев.
Бөлім қызметкерлері осы иттердің көмегімен тоқсан сайын бір рет тінту жұмыстарын жүргізеді.
