Сәтбаев қаласында көпқабатты тұрғын үйдің кіреберіс есігін қасақана бүлдірген азамат сот шешімімен бес тәулікке әкімшілік қамаққа алынды, - деп хабарлайды Polisia.kz.
Құқық бұзушылық туралы хабарлама "Көршілер бақылауы" чатына түскен. Учаскелік полиция инспекторлары оқиғаға қатысы бар азаматты анықтап, жинақталған материалдарды сотқа жолдады. Сот шешімі шыққанға дейін ол уақытша ұстау изоляторына орналастырылды.
"Көршілер бақылауы" – тұрғындар мен учаскелік полиция инспекторлары арасында тікелей байланыс орнатуға мүмкіндік беретін жоба. Чат арқылы тұрғындар құқық бұзушылықтар мен күмәнді жағдайлар туралы хабарлап, өздерін толғандырған мәселелерді жеткізе алады. Бұл полиция қызметкерлеріне ақпаратты жедел алып, тиісті шараларды уақытылы қабылдауға көмектеседі.
Қоғамдық тәртіп пен тұрғындардың қауіпсіздігін қамтамасыз ету – ортақ міндет. Ортақ мүлікке ұқыпты қарау және құқық бұзушылықтарға бейжай қарамау – әр азаматтың жауапкершілігі. "Көршілер бақылауы" жобасы осы бағытта тұрғындар мен полиция арасындағы өзара байланысты нығайтуға ықпал етеді.
