Шымкентте телефон тартып алған үш азамат ұсталды, – деп хабарлайды Polisia.kz.
Еңбекші ауданы полиция басқармасына жергілікті тұрғын арызданған. Ол онда, қаладағы дәмханалардың бірінде тамақтанып отырғанында үш жас жігіттің әлімжеттікпен физикалық күш көрсетіп, Apple iPhone X телефонын өзінше билік ету арқылы тартып алып кеткендігін жазып көрсеткен. Жәбірленушіге келтірілген шығын көлемі 120 мың теңгені құрап отыр.
Аталған жайт ҚР ҚК-нің 389-бабы 3-бөлігімен (Өзінше билік ету) сотқа дейінгі тергеп-тексерулердің бірыңғай тізіліміне тіркелді.
Криминалдық полиция бөлімінің қызметкерлері оқиға орнына жедел жетті. Күдікті азаматтарды ұстау үшін шұғыл іздестіру жұмыстарын жүргізіп, қылмысты ашуға бағытталған барлық қажетті шараларды қабылдады. Көрген-білгендерден жауаптар алынып, бейнебақылау жүйелері жіті қаралды. Нәтижесінде күдікті ретінде жергілікті жердің 22 жастағы және Түркістан облысының 23 жастағы екі тұрғыны анықталып, жеткізілді. Үшеуі де бұрын-соңды сотты болмаған, тұрақты жұмыстары жоқ.
Қазіргі кезде ұсталған азаматтардың басқа да осы тектес қылмыстарға қатыстылығы анықталуда. Тергеу әрекеттері жалғасып жатыр.
