СҚО полицейлері мектеп-интернат оқушыларына мереке ұйымдастырды, – деп хабарлайды Polisia.kz.
Отбасы күні қарсанында СҚО полицейлері отбасылық жылулыққа мұқтаж Соколовка мектеп-интернатындағы балаларға барып қайтты. СҚО ПД Емханасы бар госпиталінің бастығы Олжас Есенеев, Қызылжар ауданы полиция бөлімі бастығының орынбасары Болат Жұмағазин және учаскелік инспекторлар оқушыларды оқу жылының басталуымен құттықтады. Мерекелік дастарқан мен аниматорлардың көңілді ойындары балалардың көңілінен шықты. Ойындар, конкурстар, ән мен би – балалар қуана көңіл көтерді. Замануи полициядағы құрал-жабдықтар балаларға ерекше әсер етті. Тәртіп сақшылары оқушыларға бронды кеудешені, каскаларды көрсетті, балалар полиция көлігіне отырып көрді.
– Біз полиция қызметкерлеріне, дәрігерлерге келіп 1 қыркүйекпен құттықтағандары үшін ризашылығымызды білдіреміз, – деп ойын білдірді 9 сынып оқушысы Ира Олизкова.
Полицейлер бұл акция алдағы уақытта да жалғасатынын атап өтті.
– Аудандық полиция бөлімі қиын өмірлік жағдайға тап болған балаларға әрдайым қолдау көрсетеді. Оқу жылына дайындалуға көмектесіп, түрлі іс-шараларды ұйымдастырамыз, мәселен, балаларды аудандық полиция бөліміне экскурсияға апарып, кезекші бөлімді, тир, музейді көрсеттік. Бұл жұмыс ҚР Президенті жариялаған ағымдағы Балалар жылы аясында аса өзекті. Осы ұл-қыздардың адал, жан-жақты, еліміздің болашағына үлестерін қосатын тұлғалар болуы аса маңызды, – дейді Болат Жұмағазин.
