Қазақстан полициясы күні қарсаңында Түркістан облыстық ПД-ның жаңа ғимаратында мерекелік іс-шара өтті, – деп хабарлайды Polisia.kz.
23 маусым – Қазақстан полициясы күні мерекесіне орай Түркістан облысы полиция департаментінің жаңа ғимаратында алғашқы мерекелік іс-шара өтті. Жиынға Түркістан облысы ПД басшы құрамы мен ішкі істер органының ардагерлері, жеке құрам қатысты.
Жиында ҚР Мемлекеттік Туы құрметпен кіргізіліп, Әнұран шырқалды. Жақын арада бүкіл қазақ жұртын алаңдатып, бірқатар азаматтарымыздың өмірін жалмаған Абай облысындағы орман өртіне байланысты, жылдағыдай мерекелік концерттік бағдарлама өткізілмеді. Ішкі істер саласында қызмет етіп, жұмыс барысында қаза тапқан полиция қызметкерлерінің рухына бас иіп, 1 минут үнсіздікпен еске алу рәсімі өтті. Олардың жұбайларына гүл шоқтары мен бағалы сияпаттар тарту етілді. Құттықтау бейнероликтері көрсетілді.
Алғашқы құттықтау сөзін Түркістан облысы ПД бастығының орынбасары Бауыржан Сапар алып, халықтың тыныштығы үшін қызмет етіп жүрген ПД-ның полицейлеріне ыстық лебізін білдірді.
– Құрметті ішкі істер органдарының ардагерлері! Сіздерді мерекемен құттықтай отырып, жас мамандарға жол көрсетіп жүргендеріңіз үшін алғыс білдіремін. Арамызда аман есен жүріңіздер, күш қуаттарыңыз сарқылмасын! Еліміздің қорғандары! Еңбектеріңіз ел алдында елене берсін! Осы тұста жыл бойы жақсы нәтижелерімен көзге түскен бірқатар полицейлерімізге құрмет көрсетпек ниеттеміз, – деп Бауыржан Сапар ақжарма тілегін жаудырды.
Одан кейін марапаттау рәсімі жалғасып, ҚР ІІМ бұйрығымен кезектен тыс полиция майоры арнаулы атағы Айгерім Төрегелдиеваға берілді. Ал бір саты жоғары полиция подполковнигі арнаулы атағын Әуелбек Каликулов, Қайрат Шабидинов, Есенжан Жанысбаев иеленді. «Құқық тәртібін қамтамасыз етуге қосқан үлесі үшін» медалі Ғалымжан Тұрашбеков, Серік Қарабаевқа, I дәрежелі «Ішкі істер органдарының үздігі» төс белгісі Ержан Сәбитханұлы, Бағлан Серикбаевқа тағылды. ҚР Ішкі істер министрінің Құрмет грамотасымен баспасөз хатшысы Гүлнар Абдужаппарова марапатталды. Ал ішкі істер министрінің грамотасымен Қуаныш Екузаев, Шыңғысхан Мұратбекұлы марапатталды.
Министрліктің алғыс хаты Ердос Қалыбаевқа, Қалижан Мұсалимовқа, Нұрлан Икимбаевқа табысталды. Сонымен қатар облыс полицейлеріне Түркістан облыстық мәслихатының, Түркістан облыстық «АМАНАТ» партиясының марапаттары табыс етілді Ал ҚР Ұлттық қауіпсіздік комитетінің Түркістан облысы бойынша департаменті бастығының алғыс хатымен жергілікті полиция қызметі басқармасының бастығы Асылхан Төреханов, жылдам қимылдайтын арнайы жасағаның командирі Қанат Дильдабеков, оқу-жаттығу взводы командирінің кәсіби қызметтік және денешынықтыру даярлығы жөніндегі орынбасары Серік Абдуллаевқа табысталды.
Осылайша өңірдің өркендеуі мен дамуы үшін аянбай еңбек етіп, өздерінің қызметтік міндеттерін адал атқарып, жоғары көрсеткіштерге қол жеткізген ең үздік қызметкерлерге қошемет көрсетілді. Айтулы іс-шара соңында еңбегі еленіп, марапатқа ие болған тәртіп сақшылары өздерінің шынайы алғыстарын жеткізді. Сонымен қатар мерекелік құттықтау сөзін ҚР ІІО Құрметті ардагері Мұхтар Ермеков, Оспанғазы Жанқожаев жалғап, ыстық ықыластарын білдірді. Іс-шара соңында полиция департаментінің жаңа ғимаратында Ашық есік күнін ұйымдастырумен жалғасты. Яғни, жиынға арнайы келген қонақтар жедел-басқару орталығы ғимаратын аралап, ондағы қызметкерлердің жұмысымен танысты. Сондай-ақ алдағы істеріне сәттілік тілеп, естелікке суретке түсу рәсімімен қорытындыланды.
