Түркістан облысының ПД басшысы спортшы полицейлерді марапаттады, – деп хабарлайды Polisia.kz.
Түркістан облысы Полиция департаментінің бастығы Мұрат Қабденов әрқашан жеке құрамға қолдау көрсетіп, еңбегіне қарай мақтап, марапаттап отырады. Мұның барлығы полицейлер үшін үлкен демеу, ынталандыру. Дәл осындай салтанатты сәт мәжіліс залында ұйымдастырылып, облыстың бас полицейі спорттық сайыстарға қатысып, жүлделі орындарға ие болған тәртіп сақшыларына тиісті марапаттарын табыстады.
Ерлермен қатар ішкі істер саласында еңбек етіп жүрген Айнұр Ақжігітова Нұр-Сұлтан қаласында белбеу күресінен ерлер мен әйелдер арасында өткен Қазақстан Республикасының Чемпионатында бірінші орын және кураш күресінен ерлер мен әйелдер арасында Қазақстан Республикасының Чемпионатында үшінші орын иеленген. Сонымен қатар, кураш күресінен ерлер мен әйелдер арасында өткен Чемпионатта полицей Сәкен Жақсыкелді үшінші орынмен марапатталды.
Ал полицей Ерболат Алиакбаров Түркістан қаласында астана күніне орайластырылған қазақ күресінен «ҚАЗАҚСТАН БАРЫСЫ» республикалық турнирге қалалық іріктеуге қатысып, түйе палуандар арасында үшінші орын және Алматы қаласында өткен спорттық самбо күресінен үшінші орынды иеленді.
Ал жеке құрам арасында чемпион қыз аталып кеткен Перизат Жақыпбекова өзінің кәсіби шеберлігі мен мықтылығын таныта білді. Осылайша Орал қаласында өткен ерлер мен әйелдер арасында дзюдо күресінен Кеңес одағының батыры М. Мәметованы еске алуға арналған оныншы ашық республикалық турниріне қатысып, жүлделі бірінші орынды қанжығасына байлаған.
Түркістан облысы Полиция департаментінің қызметкерлері арасында спорт сайысының жеңімпаздары мұнымен толастамайды. Мәселен, Алматы қаласында өткен спорттық самбо күресінен бірінші орын және Солтүстік Қазақстан облысы Петропавл қаласында өткен «Динамоның» 2022 жылға арналған спорттық күнтізбелік жоспарына сәйкес, қазақша күрестен 82 келі салмақ дәрежесінде бірінші орын иеленіп, «Динамо барысы» атанған Еркеғали Қуандық та марапатталды.
Алматы қаласында өткен спорттық самбо күресінен екінші орын алған полицей Бексұлтан Оразымбет те, үшінші орынды иемденген Айбек Эрметов пен Сабыржан Әбілдаұлы да М. Қабденовтың марапатына ие болды.
Сонымен қатар, волейболдан Қазақстан Республикасының ХХХ Чемпионатының бес тур нәтижесі бойынша Түркістан облысының «Тұран-Динамо» командасы екінші орынды иеленген.
