Түркістанның полицейлеріне ерікті түрде сегіз тұрғын қаруларын тапсырды, – деп хабарлайды Polisia.kz.
ҚР ІІМ бұйрығына сәйкес 2021 жылдың 20 сәуірінен бастап республика көлемінде “Заңсыз сақталған атыс қаруын, оқ-дәріні және жарылғыш заттарды азаматтардан сатып алу” акциясы өткізілуде. Осы бағытта Түркістан облысында тәртіп сақшыларымен қарқынды жұмыстар атқарылуда. Көпшілікке өз еркімен тіркелмеген қаруларды өткізген жағдайда сыйақы алуға болатындығы түсіндірілуде. Осы тұста бірнеше тұрғындар қаруларын табыстап, акцияға белсенді қатысуда.
Мәселен, Ордабасы аудандық полиция бөліміне сегіз тұрғын өздерінің аталарынан қалған тоғыз қаруды өткізді. Қазіргі уақытта мылтықтар сот-баллистикалық сараптамасына жіберілді. Нәтижесінде тұрғындарға ақшалай қаражат төлеу туралы шешім қабылданатын болады.
Айта кететін жайт, қару-жарақ заттарын өз еркімен тапсырғаны үшін мемлекет қарудың әрқайсысына тиісті төлемін жасайды. Ал сыйақы төлеу қару-жарақ заттарын тапсырған азаматтар ұсынған шоттарға аудару жолымен жүзеге асырылады. Тіркелмеген атыс қаруын, оқ-дәрілер мен жарылғыш заттарды өз еркімен тапсырған азаматтар қылмыстық және әкімшілік жауапкершіліктен босатылады.
