Ақпараттық медиа-портал POLISIA.KZ

Жетісайлық полицей өрт шыққан ғимараттан әжейді аман алып шықты

Жетісайлық полицей өрт шыққан ғимараттан әжейді аман алып шықты, – деп хабарлайды Polisia.kz

Отбасылық жағдайына байланысты Шымкент қаласына барып, қайтып келе жатқан жетісайлық полицей Аян Рысбеков, өрт ішінен егде жастағы әйелді алып шығып, ерлік жасады. Нақтырақ айтсақ, полицей Аян өзінің отбасымен бірге көлікпен келе жатып, сусын алу үшін Қазығұрт ауданына қарасты күре жолдың бойындағы дүкені бар жазғы тамақтану орнына тоқтайды.

Осы сәтте көліктен түскен полицейге сол жердегі жас қыз жүгіріп келіп, өрт болып жатқанын, ғимарат ішінде апасы қалып қойғанын айтып, көмектесуін сұрайды. Мұны естіген полицей бір сәтте ойланбастан өрт болып жатқан аймаққа қарай жүгіреді. Бар ойы іштегі адамды аман алып шығу болды.

Содан алдынан тағы бір ер адам шығып, ішке кіре алмай тұрғанын, іштегі адамды құтқару керектігін айтады. Содан екеулеп отырып, қызыл жалынға оранған қоймалардағы өртті сөндіруге кіріседі. Айналада су жоқтығын көріп, жерді қазып топырақпен сөндіруге әрекет етеді. Осылайша полицей іште жалын ортасында тұрған апаны шығару үшін қазып алған топырақпен жол жасай отырып, апаны өрттен аман алып шығады.

Тілсіз жаудан егде жастағы әйелді құтқарған ержүрек адам – Жетісай аудандық полиция бөлімінің көші-қон қызметі бөлімшесінің бастығы Аян Хайруллаев.

– Ойланып тұруға уақыт болмады, содан бірден отқа оранып жатқан жерге кіріп кеттім де, апаны сыртқа алып шықтым. Қайғылы жағдайдың алдын алуыма қызмет барысында оқып-үйренген өрт қауіпсіздігі туралы ережесінің пайдасы тиді. Біз үшін тұрғындардың амандығы, әрі тыныштығынан асқан бақыт жоқ, – деді бейбіт күннің батыры.

Осылайша полицей өрт сөндірушілер келемін дегенше лаулаған өртті топырақ шашып ауыздықтады. Аян Хайруллаев 2011 жылдан бері ішкі істер саласында қызмет етіп келеді. 

Аталған жайт Қазығұрт АПБ-ға ҚР ҚК-нің 202-бабымен (Бөтеннің мүлкін қасақана жою немесе бүлдіру) тіркеліп, тергеп-тексеру амалдары жүргізілуде. 

Сондай-ақ оқыңыздар

Жауап қалдыру