Астаналықтардың сатып алған 24 телефонын курьер талан-таражға салған, – деп хабарлайды Polisia.kz.
Полицияға тауарларды жеткізу компаниясының өкілі өтінішпен жүгініп, курьер сатып алушыларды алдап, телефондарды ұрлап кеткенін хабарлаған. Тергеу барысында ЖШС қызметкері интернет-дүкеннен тауарларды жеткізумен айналыса отырып, клиенттерге 24 телефонды жеткізбегені анықталды. Бұл ретте алаяқ курьер құжатқа сатып алушылардың қолтаңбаларын қолдан жасап қойып, гаджеттерді сатып жіберген.
Жедел-іздестіру іс-шараларын жүргізу кезінде полиция қызметкерлері алаяқтық жолмен телефондарды иемденген Көкшетау қаласының 26 жастағы тұрғынын анықтады.
Аталған фактіге қатысты ҚР ҚК-нің 190-бабының 3-бөлігі бойынша сотқа дейінгі тергеу амалдары жүргізілуде. Жас жігіт үй қамауына алынды. Оның елорда аумағында бұрын жасалған осыған ұқсас қылмыстарға қатысы бар-жоғы анықталып жатыр.
Астана қаласының Полиция департаменті азаматтарға Қылмыстық кодекске сәйкес аталған қылмыс мүлкі тәркіленіп, үш жылдан жеті жылға дейінгі мерзімге бас бостандығын шектеу не сол мерзімге бас бостандығынан айыру түрінде жазаланатынын ескертеді.
