Теміртауда Ерлан Нұрғалиевті еске алуға арналған футзалдан турнир өтті, – деп хабарлайды Polisia.kz.
Теміртау қаласында полиция майоры Ерлан Нұрғалиевті еске алуға арналған футзалдан республикалық турнир болып өтті. Байрақты бәсекеге полиция қызметкерлерімен ішкі істер органдарының ардагерлері қатысты. Қазақстан Республикасы Ішкі істер министрлігі, Астана, Солтүстік-Қазақстан, Павлодар, Жамбыл және Қызылорда облыстарынан бас-аяғы 10 команда өзара бақ сынасты. Қарағанды облысынан байрақты бәсекеге үш команда, атап айтқанда облыстық ПД-нің командасы, Балқаш қалалық полиция бөлімі және Нұра аудандық полиция бөлімдерінен командалар келді.
Ерлан Нұрғалиев ішкі істер органдарындағы қызметін кәмелеттік жасқа толмағандармен жұмыс істеу тобының инспекторы лауазымынан бастап, Нұра аудандық полиция бөлімінің учаскелік полиция инспекторына дейінгі қызмет жолынан өтті. Зейнет жасына шыққаннан кейін елге қызмет етуін тоқтатпай, табиғатты қорғау саласына бет бұрып, «Охотзоопром» республикалық мемлекеттік коммуналдық мекемесінде еңбек етті. Ерлан Нұрғалиев 2019 жылдың 15 қаңтарында заңсыз аң аулаған браконьерлерді ұстау барысында ерлікпен қаза тапты. Қазақстан Республикасы Президентінің жарлығымен қылмыскерлерді ұстауда танытқан ерлігі үшін ІІІ-ші дәрежелі «Барыс» орденімен қаза тапқаннан кейін марапатталды.
Турнирге Қарағанды облыстық полиция департаменті, Теміртау қалалық полиция басқармасының басшылығы, «Охоотзопром» ұйымының өкілдері және Ерлан Нұрғалиевтің туған туыстары қатысты.
– Ерлан Нұрғалиев ішкі істер органдары қызметкерлерінің мәңгі есінде. Оның ерлігі өскелең ұрпаққа үлгі-өнеге. Жарысқа қатысушыларға сәттілік тілеймін, – деді жарыстың ашылу салтанатында сөз сөйлеген департамент бастығының орынбасары Дәурен Ибраев.
Жарыс қорытындысы бойынша, «Үздік қақпашы» номинациясымен Ерлан Ишанов (Павлодар облысының ПД), «Үздік қорғаушы» номинациясымен Дархан Әлібеков (Балқаш қаласы ПБ), «Үздік шабуылдаушы» номинациясымен Асылхан Абдреев (Қызылорда облысының ПД), «Үздік бомбордир» номинациясымен Алмас-хан Лепесов (Жамбыл облысының ПД), «Турнирдің үздік ойыншысы» номинациясымен Өмірзақ Рахимберлинов (ҚР ІІМ) марапатталса, командалар арасында бірінші орынды Жамбыл облыстық полиция департаментінің командасы иеленсе, екінші орынды Қарағанды облыстық ПД, Балқаш қалалық полиция бөлімінің командасы, ал үшінші орынды Қазақстан Республикасы Ішкі істер министрлігінің командасы қанжығаларына байлады.
Жеңімпаздар бағалы сыйлық, грамота, медаль және кубоктармен марапатталды.
