Қазақстан халқының бірлігі, Отанға деген сүйіспеншілік, отбасылық дәстүрлер мен құндылықтар ішкі істер органдары қызметкерлерінің арасында өтетін “Міндет, абырой, ерлік” көркемөнерпаздар байқауының тақырыбына айналды. Оған Солтүстік Қазақстан полицейлері де қатысты, – деп хабарлайды Polisia.kz.
Ән шырқап, өлең оқу, би нөмірлері — тәртіп сақшылары қазылар алқасына бар өнерлерін көрсетті. Ұсынылған нөмірлерде полиция жұмыс күндері де, қазіргі Қазақстанның тұрақты құндылықтары да көрініс тапты.
– Мұндай іс-шаралар полицияның жеке құрамын патриоттық тәрбиелеудің тағы бір жарқын, эмоционалды бай нысаны саналады. Көптеген қатысушы нағыз көркемдік талантын, еңбекқорлығы мен тапқырлығын көрсетті. Мысалы, Есіл ауданының полиция бөлімі қызметкерлерінің сөз сөйлеуі жақсы әсер қалдырды, олар бірден үш қатысушыны түрлі жанрда таныстырды: мұнда “Қиын іс” әнін орындау, М.Жұмабаевтың “Жан сөзі” өлеңін оқу және учаскелік полиция инспекторы Жангүл Ибрахимованың орындауындағы ұйғыр биі, – деді СҚО ПД бастығының орынбасары Сәуле Андағұлова.
Байқаудың өңірлік кезеңінің қорытындысы отбасы күнінде шығарылады. Жеңімпаздар маусым айының басында болатын республикалық байқауда Солтүстік Қазақстан полициясының намысын қорғайтын болады. Сондай-ақ погондардағы әртістердің үздік әндері Қазақстандық полиция күніне арналған маусымдық концертте және ведомствоның мәдени орталығының дәстүрлі қайырымдылық концерттерінде орындалады.
