Алматыда заңсыз жұмыс істеген өзбекстандық 15 азамат анықталды, – деп хабарлайды Polisia.kz.
Заңсыз жұмыс істеген шетелдік азаматтарды полиция қызметкерлері 2-8 қазан аралығында өткізіліп жатқан «Нелегал» республикалық жедел алдын алу іс-шарасы барысында анықтады.
– Мақсат – заңсыз жүрген шетелдіктерді анықтау, сондай-ақ заңсыз көші-қон арналарының жолын кесу. Іс-шара аясында қаланың Наурызбай ауданында ҚР-ның көші-қон заңнамасын бұзған Өзбекстанның 15 азаматы ұсталды. Олар құрылыс және жол жұмыстарына заңсыз тартылған. Тексеру кезінде шетелдіктердің жеке басын куәландыратын құжаттары болмаған. Олар ПД-ның қабылдап-таратуына орналастырылды. Әрбір құқық бұзушының жеке басын анықтау жұмыстары жүргізілуде, – деп хабарлады Алматы қалалық ПД көші-қон қызметі басқармасының бастығы Асхат Бутунчинов.
Сондай-ақ полиция мемлекеттік шекараны заңсыз кесіп өткен Ресей Федерациясының 35 жастағы азаматшасын ұстағаны туралы хабарлады.
Аталған дерек бойынша ҚР ҚК-нің 392-бабына сәйкес қылмыстық іс тіркеліп, тергеліп жатыр.
