Ақмолалық полицей Ресей ІІМ басқару академиясында оқып жатыр, – деп хабарлайды Polisia.kz.
Полиция майоры Саябек Жакулин – Ресей ІІМ басқару академиясының ғылыми және ғылыми-педагогикалық кадрларды даярлау факультетінің адъюнкті. Қазақстан полициясының 30 жылдығы қарсаңында ақмолалық полицей өзінің қызметі мен оқуы туралы айтып берді. Ол үшін 23 маусым тек кәсіби мереке ғана емес, бұл күні ол туған күнімен құттықтауларды да қабылдайды.
Саябек Шәріпұлы 1990 жылы 23 маусымда Көкшетау облысы Уәлиханов ауданы (қазір Ақмола облысы Біржан сал атындағы аудан) Уәлиханов ауылында дүниеге келген. 2005 жылы Көкшетау қаласындағы №4 орта мектепті бітіргеннен кейін, жас жігіт «Арна» Көкшетау колледжіне «құқықтану» мамандығына оқуға түсті. 2008 жылы оқуын жалғастыруды шешіп, Қазақстан Республикасы ІІМ Б. Бейсенов атындағы Қарағанды академиясына оқуға түсті. ІІБ-гі қызметін Көкшетау қалалық ІІБ тергеу бөлімшесінің жеке тұлғаға қарсы аса қауіпті қылмыстарды тергеу бөлімшесінің тергеушісі болып бастады. Кейін жол-көлік оқиғаларын тергеу жөніндегі полиция департаменті анықтау басқармасының аға анықтаушысы болып қызметін жалғастырды. Бір жылға жуық Зеренді аудандық полиция бөлімі штабының аға инспекторы лауазымында болды, 2020 жылдың қыркүйегінен бастап Ақмола облысы ПД әкімшілік полиция басқармасы жанындағы әкімшілік практика бөлімінің инспекторы болып жұмыс істеді.
2021 жылы осы лауазымнан Қазақстан Республикасы ІІМ мен Ресей Федерациясының ведомствоаралық келісімі негізінде Ресей ІІМ басқару академиясының ғылыми және ғылыми-педагогикалық кадрларды даярлау факультетінің күндізгі бөліміне түсті. Қазіргі уақытта ол «Қазақстан Республикасының материалдары бойынша адам өліміне әкеп соққан жол қозғалысы ережелерінің бұзушылықтары немесе көлік құралдарын пайдалануды тексеру әдістемесі» тақырыбында диссертациялық зерттеу жазуда. Зерттеу тақырыбы кездейсоқ таңдалған жоқ. Оны жазудың алғышарттары адам өліміне әкеп соқтырған жол-көлік оқиғалары ретінде қылмыстық құқық бұзушылықтың осы түрін тергеудің практикалық қызметі болды. Осы тақырып бойынша диссертациялық зерттеу жазудың бастамашысы Қазақстан Республикасы ІІМ Қарағанды академиясының криминалистика кафедрасының ғылыми жетекшісі және Саябектің тәлімгері, заң ғылымдарының кандидаты А. Еленюк болды.
– Басқа елде оқу өте қызықты. Профессорлық-оқытушылар құрамы өте мықты. Бірақ Отаннан қымбат ештеңе жоқ. Үйде мені отбасым, ең қымбат адамдар күтуде. Мен осында алған білімімді мемлекетімізге енгізгім келеді, – деп түйіндеді полиция майоры.
