Қаңтар айындағы оқиғалар кезінде қаза тапқан әділет прапорщигі Ербол Ержановты еске алу үшін Алматы облысы бойынша ҚАЖД волейболдан турнир өткізді, – деп хабарлайды Polisia.kz.
Қаңтар айындағы оқиғалар кезінде қаза тапқан ЛА-155/16 мекемесінің қызметкері Ербол Ержановты еске алуға, сондай-ақ Қазақстан полициясының 30 жылдығын мерекелеу күніне орай Алматы облысы бойынша ҚАЖ департаменті «Динамо» ҚР Дене шынықтыру-спорт қоғамы қоғамдық бірлестігінің Алматы облыстық филиалының қолдауымен волейболдан турнир өткізді.
Салтанатты шара бір минут үнсіздікпен басталды. Турнирге ведомстволық бағынысты мекемелер, сондай-ақ департамент, пробация қызметі және ҚАЖ ардагерлерінің командалары қатысты.
– Батырдың есімі біздің жадымызда мәңгі қалады. Мұндай іс-шаралар көбінесе батырларды еске алуға арналады, сонымен қатар салауатты өмір салтын ынталандыру және ҚАЖ қызметкерлері арасында дене шынықтыру мен спортты дамытудың жақсы үлгісі болып табылады, – деп атап өтті Алматы облысы бойынша ҚАЖД бастығының орынбасары Жәнібек Қосжанов.
Турнирде бірінші орынды ЛА-155/16 тергеу изоляторы, екінші орынды ЛА-155/8 қауіпсіздігі жоғары мекемесі және үшінші орынды департамент командасы иеленді.
Жеңімпаздарға грамоталар, медальдар және сыйлықтар табыс етілді.
