Шымкентте полицейлер 4 келіге жуық марихуана тасымалдаған ер адамды құрықтады, – деп хабарлайды Polisia.kz.
Есірткі қылмысына қарсы іс-қимыл басқармасының қызметкерлері 4 келіге жуық марихуана тасымалдаған ер адамды құрықтады. Тергеу барысында күдікті Жамбыл облысынан Шымкент және Түркістан облысына есірткі тасымалдап жүргені анықталды.
Ұсталған азамат Шымкент қаласы ПД-нің Уақытша ұстау абақтысына қамалды. Сотқа дейінгі тергеу амалдары жүргізіліп жатыр.
Қазіргі таңда полицейлер ҚР Қылмыстық кодексінің 297-бабы (Есірткі, психотроптық заттарды,сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) бойынша сотқа дейінгі тергеу амалдарын жүргізуде. Заң бойынша бұл қылмысты жасағаны үшін бас бостандығынан айыру жазасы қарастырылған.
