Петропавлда пробация қызметкерлері шағын футболдан жеңімпаз атанды, – деп хабарлайды Polisia.kz.
Петропавл қаласының 270 жылдығына орай Жастар ресурстық орталығы шағын футболдан жарыс ұйымдастырды. Жарысқа 11 команда қатысты: Петропавл қаласының пробация қызметкерлері мен есептегі сотталғандардан құралған екі құрама команда.
Іс-шараның негізгі мақсаты – салауатты өмір салтын қолдау және зиянды әдеттерге қарсылық білдіру.
– Осындай жарыстарды өткізгеннен кейін бас бостандығынан айыру мекемелерінен босатылған және пробация қызметінде есепте тұрған жастар салауатты өмір салтын ұстануға және заңға бағынуға ынталы болады, – деді СҚО бойынша ҚАЖД-да.
Спорттық тартыстың нәтижесінде бірінші орынды «Пробация» командасы, екінші орынды «Алаш» командасы иеленсе, «Қаламгер» командасы үздік үштікті түйіндеді. Жарыс соңында командаларға мақтау қағаздары мен кубоктар табыс етілді.
