Әлеуметтік желіде полиция қызметкерлерінің заңды талабына бағынбай, көлігімен артқа қарай жүріп қашқан ВАЗ 2107 автокөлік жүргізушісінің бейнежазбасы таралған болатын, – деп хабарлайды Polisia.kz.
Тексеру кезінде оқиғаның кешкі уақытта Сарыағаш ауданындағы елді мекендердің бірінде болғаны анықталды.
Ал полиция қызметкерлері жол ережесін өрескел бұзған жүргізушіні сол сәтте тоқтатып, оны әкімшілік жауапкершілікке тартты. Сондай-ақ құқық бұзушының ВАЗ көлігі «ресейлік нөмірлі» және техникалық байқаудан өтпеген болып шықты.
Нәтижесінде Сарыағаш ауданының тұрғыны, яғни жүргізушіге қатысты ҚР ӘҚБтК-нің 590-бабы 9-бөлігі «Көлік құралдарын пайдалану қағидаларын бұзу» және ҚР ӘҚБтК-нің 595-бабы 1-бөлігі «Маневр жасау қағидаларын бұзу» бойынша әкімшілік хаттама толтырылды. Автокөлік айыптұраққа қойылды.
Жүргізуші жас жігіт өзінің теріс әрекеті үшін кешірім сұрап, алдағы уақытта қайталамауға уәде берді.
Полицейлер жүргізушілер мен жол қозғалысының өзге де қатысушыларына жол ережелерін қатаң сақтауды ескертеді.
