Мақтааралда пәтер алып беремін деп алаяқтық жасаған әйел қолға түсті, – деп хабарлайды Polisia.kz.
Мақтаарал аудандық полиция бөліміне жергілікті тұрғын арызданды. Жәбірленуші әйелдің айтуынша, белгісіз азаматша өзін отбасылық жағдайы төмен адамдарға көмектесетін ұйымның өкілі ретінде таныстырып, көпқабатты үйден пәтер алып беремін деп 2 миллион теңге ақшасын алған.
Аталған жайтты полиция қызметкерлері ҚР ҚК-нің 190-бабы (Алаяқтық) бойынша тіркеуге алды.
Хабарлама келіп түскен бойда тәртіп сақшылары бірден іске кірісті. Олар алаяқтық қылмысына қатысы бар күдіктіні ұстауға бағытталған шараларды жүзеге асырды. Нәтижесінде сезікті жұмыссыз әйел болып шықты.
Тексеру кезінде күдікті бір жыл өтіп кетсе де берген уәдесін орындамағаны анықталды. Ол жәбірленушіден алған ақшаны бас пайдасына қажеттілігі үшін жаратып жіберген. Қазіргі таңда сотқа дейінгі тергеу амалдары жүргізіліп жатыр.
