ІІМ көші-қон жөніндегі халықаралық ұйыммен бірлесіп, Президент Әкімшілігі қызметкерлерінің, депутаттардың, ғылыми қоғамдастықтың, халықаралық, үкіметтік емес ұйымдардың және мүдделі мемлекеттік органдар өкілдерінің қатысуымен адам саудасына қарсы іс-қимыл мәселелері жөнінде форум өткізді, – деп хабарлайды Polisia.kz.
Форумның мақсаты – «Қазақстан Республикасында адам саудасына қарсы іс-қимыл туралы» Заң жобасын таныстыру, сондай-ақ осы саладағы халықаралық стандарттар мен шетелдің оң тәжірибесін талқылау.
Қатысушылар заң жобасын, сондай-ақ ІІМ әзірлеп жатқан Қоғамдық қауіпсіздікті қоғаммен серіктестікте қамтамасыз ету тұжырымдамасы арқылы адамдардың құқықтарын қорғау саласындағы заңнаманы жетілдіру мәселелерін егжей-тегжейлі талқылады.
Мемлекет басшысының тапсырмасы бойынша ІІМ «Адам саудасына қарсы іс-қимыл туралы» Заң жобасын әзірледі.
Жоба 6 тараудан тұрады (22 баптан құралған). Олар мыналарды қамтамасыз етеді:
– жаңа тұжырымдамалық аппаратты енгізу;
– уәкілетті мемлекеттік органдарды құру;
– халықаралық ынтымақтастық негіздері;
– ҮЕҰ рөлін анықтау;
– жәбірленушілердің (оның ішінде кәмелетке толмағандардың) құқықтары мен міндеттері.
Адам саудасына қарсы күресте халықаралық тәсіл енгізіліп жатыр.
Серіктестік. Мұнда алғаш рет заң деңгейінде ІІМ және еңбек министрлігі атынан уәкілетті органдар айқындалады. Басқа мемлекеттік органдардың, ҮЕҰ-ның функциялары бекітіледі.
Ескерту. Адам саудасының тәуекелдерін бағалауды қоса алғанда, алдын алуға баса назар аударылады. Мұнда әдіснаманы әзірлеу, құқық бұзушылыққа ықпал ететін себептерді іздеу бойынша зерттеулер жүргізу, оларды жою көзделеді.
Қудалау. Адам саудасының барлық нысандары, соның ішінде мәжбүрлі еңбек, жыныстық қанау және адам ағзаларын алушылар үшін жауапкершілікті көздейтін қылмыстық заңнамаға сілтеме нормасы енгізіледі.
Жәбірленушілерге көмек. Мұнда қылмыстық іс қозғалған-қозғалмағанына қарамастан «адам саудасының құрбаны» ұғымы заңды түрде анықталады.
– Адам саудасының проблемалары әлемнің барлық елдеріне тән. Қазақстанда да бұл мәселе кездеседі. Жыл сайын елде осындай 100-ден астам қылмыс тіркеледі. Жыл басынан бері 65 қылмыс анықталды, аталған салада ұйымдасқан қылмыстық топтың қызметі тоқтатылды, – деп атап өтті министр.
Іс-шарада басқа елдердегі адам саудасына қарсы күрес бағытындағы халықаралық стандарттар мен үздік тәжірибелер талқыланды.
