Астанада сұлулық салонынан тұрғынның мүлкін ұрлап кеткен азамат анықталды, – деп хабарлайды Polisia.kz.
Полицияға елорда тұрғыны Иманбаев көшесінде орналасқан сұлулық салонынан белгісіз адам ақша мен жеке заттары бар рюкзакты ұрлап әкеткені туралы арызбен жүгінген.
Жедел-іздестіру іс-шараларын өткізу барысында полиция қызметкерлері ұрлыққа қатысы бар 29 жастағы ер адамды анықтады. Күдікті клиент кейпінде сұлулық салонына келгені белгілі болды. Үй-жайға кіріп, ол гардероб бөлмесінде рюкзакты байқаған. Ешкім байқамай тұрған сәтті пайдаланып, ол бөтеннің мүлікін иемденіп, қашып кеткен.
Ер адамның ұрлықтың тағы бір эпизодына қатысы бары анықталды. Қабанбай батыр даңғылындағы үйдің паркингінен ол 300 мың теңге тұратын Kude велосипедін алып кеткен.
Аталған фактіге қатысты ҚР ҚК-нің 188-бабы (Ұрлық) бойынша сотқа дейінгі тергеу амалдары басталды. Қазіргі уақытта оның елорда аумағында жасалған басқа да осыған ұқсас қылмыстарға қатысы бар-жоғы тексеріліп жатыр. Ер адам Астана қаласының ПД уақытша ұстау изоляторына қамалды.
