Павлодар облысында өзін ҰҚК басшылары мен қызметкерлері ретінде таныстырған телефон алаяқтарының қатысуымен болған оқиғалар тіркелді, – деп хабарлайды Polisia.kz.
Павлодарлық әйел алаяқтардың қулығына тап болып, шамамен 30 миллион теңге несие ресімдеді.
– Шілде айында таңертең әйел өзінің басшысынан WhatsApp қосымшасында лаңкестердің шоттарына ақша аударуға байланысты ҰҚК-ге шақыру туралы хабарлама алды. Кейінірек оған «ҰҚК майоры» қоңырау шалып, оның атына шот ашылғаны және бұрын сотталған және іздеуде жүрген ер адамның атына 1 500 000 теңге аударылғаны туралы хабарлады. Өз шоттарын қорғау үшін жәбірленуші «Ұлттық банк қызметкерінің» айтқандарын істеуге келісті. Оның нұсқауларына сүйене отырып, қорыққан әйел банкке барып, өзінің депозиттік шотынан 15 000 000 теңгені алып, ертерек ұсынылған деректемеге 5 миллион теңгеден астам соманы аударды. Және осындай бірнеше ұқсас операциялар жасады. Кейін алданғанын түсінген ол полицияға жүгінді, – деп хабарлайды Павлодар облысы ПД бастығының орынбасары Болат Нұрсейітов.
Тергеу көрсеткендей, ақша аударылған адамдардың онымен мүлде байланысы жоқ. Бұл адамдармен байланысу әрекеттері олардың онлайн-табысқа және қолданбалар арқылы қашықтан қол жеткізуге байланысты алаяқтардың құрбаны болғанын көрсетті.
Қазіргі уақытта жедел уәкілдер соңғы екі жылда ҚР аумағында нөмірлері ретрансляцияланбаған абоненттердің орналасқан жерін анықтауға сұрау салулар жіберді. Қылмыс жасағандарды және олардың орналасқан жерін анықтау бойынша жедел-іздестіру іс-шаралары жалғасуда.
Павлодар облысының полиция департаменті азаматтарды қырағы болуға шақырады.
– Күдікті телефон қоңыраулары мен хабарламалар, оның ішінде әлеуметтік желілер арқылы келіп түскен жағдайда дереу полицияға хабарласуды ұсынамыз, – деп толықтырды Болат Нұрсейітов.
