Қазақстан Республикасы ІІМ Ұлттық ұланы «Орталық» өңірлік қолбасшылығына қарасты 5451 әскери бөлімінің әскери қызметшілері Астанада өтіп жатқан ауқымды шара кезіндегі қызмет барысында қырағылық танытып, алғысқа бөленді, – деп хабарлайды Polisia.kz.
9 қыркүйек күні ефрейтор Дінмұхаммед Сайлау өзінің серіктестері Азамат Қизатұлы және Дінмұхаммет Әбдіғамитпен бірге елорда көшелерінде қоғамдық тәртіп пен қауіпсіздікті қамтамасыз етуге шықты.
Сағат 20:20 кезінде оларға 10 жас шамасындағы бала келіп, көмек сұрайды. Оның айтуынша, мектептен шығып, басқа бағытқа қарай жүріп, адасып қалған. Әскери жасақ мүшелері бірлесе әрекет ету арқылы, бірден баланың ата-анасын іздеуге кірісті. Арада шамамен 15 минуттай уақыт өткенде оқушының анасын анықтап, баланы табыстады.
Ұлымен есен-сау қауышқан ана ІІМ Ұлттық ұланының сарбаздарына алғысын білдірді.
