Алматы қаласы Медеу ауданындағы М.Мәметова атындағы №28 лицейде төртінші полиция сыныбы ашылды, – деп хабарлайды Polisia.kz.
Салтанатты шараға аудандық полиция басқармасының басшылығы, «Жас сақшы» полиция сыныбының оқушылары, жоғары сынып оқушылары, ұстаздар, ата-аналар комитетінің өкілдері, полиция қызметкерлері, ІІО-ның ардагерлері қатысты.
Бұрын хабарланғандай, «Жас сақшы» полиция сыныптарын құру – Ішкі істер министрлігінің басым жобасы және ол бірінші кезекте патриотизм мен Отанға деген сүйіспеншілікті тәрбиелеуге, мектеп ортасында құқық бұзушылықтың алдын алуға және мамандық таңдауда оларға көмек көрсетуге бағытталған. Бұл бастама ІІМ үшін полицияның кәсіби өзегін сақтаудың, ұрпақтар сабақтастығын қамтамасыз етудің, уақыт өте келе қалыптасқан озық дәстүрлерді насихаттаудың ерекше маңыздылығын көрсетеді.
Жастар арасында қаһармандық пен ержүректілікті дәріптеу мақсатында Алматы қаласындағы 27 орта мектеп пен бір колледжде қызметте қаза тапқан Алматы қалалық полиция департаментінің 29 қызметкерінің құрметіне «Даңқ кабинеттері» ашылды. Бүгін қаланың Алатау және Түрксіб аудандарында орналасқан Алматының тағы екі мектебінде полиция сыныптары ашылады.
«Жас сақшы» жасақтарының санын сегізге дейін көбейту жоспарлануда, яғни әр ауданда бір-бірден.
