Маңғыстау облысы бойынша ҚАЖ департаментіне қарасты №43 мекемесінің басшылығы 1 қазан – Қарттар күніне орай ерекше кездесу ұйымдастырды, – деп хабарлайды Polisia.kz.
Бұл жолы олар өз қызметкері, жас әрі болашағынан зор үміт күттіретін бақылаушы Жантемір Нәжімовтың ата-анасына қонаққа барды. Әдеттегі ресми шара емес, бұл кездесу жылулыққа, сыйластыққа толы болды.
Жантемір Нәжімов 2022 жылдан бері ҚАЖ саласында қызмет атқарып келеді және ол өз ісінде жауапкершілігі мен адалдығы арқылы басшылықтың да, әріптестерінің де сеніміне ие болды. Ерекше кездесуде мекеме бастығының міндетін атқарушы Ербол Мақанов ата-анасына алғыс білдіріп, ұлдарының тәрбиесіне қосқан зор үлесі үшін алғыс хат табыстады.
Ата-анасы Жантемірдің бала кезден әділдікке бейім, жауапты әрі қайырымды болғанын мақтанышпен еске алды. Әңгіме барысында оның түрлі өмірлік жағдайлардағы парасаттылығы мен әділдігі туралы қызықты оқиғалар айтылды. Шағын дастархан басында басталған бұл жылы әңгіме мерекенің басты сәніне айналды.
Мұндай ерекше шаралар тек ұжымдағы достық қарым-қатынасты ғана нығайтып қоймай, аға буынға деген құрметтің нағыз үлгісін көрсетеді. Бұл күні Жантемірдің ата-анасы тек құттықтаулар мен сыйлықтар ғана алып қоймай, ұлының жетістіктеріне және оның үлгісінің арқасында өсіп келе жатқан болашақ ұрпақтың тәрбиесіне өздерінің қосқан үлесін мақтан тұтты.
